Katonqaraǵaıǵa «ıeroglıfti» kógershinder qaıdan ushyp kelgen

NUR-SULTAN. QazAqparat - Katonqaraǵaı memlekettik ulttyq tabıǵı parki Shyǵys Qazaqstanda «qytaı ıeroglıfi bar» kógershinderge qatysty habarlama taratty, dep habarlaıdy QazAqparat tilshisi QR Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń baspasóz hatshysy Sáken Dildahmetke silteme jasap.

«Ótken jyldyń qazan-qarasha aılarynda Katonqaraı aýdanynda quıryǵy men qanatynda ıeroglıf jazylǵan kók kepterler kezdesip, jergilikti halyqtyń mazasyn qashyrǵan edi. Aqsýdan Órelge deıin kezdesken kógershinderge keıbireýleri mán bermese, keıbir adamdar sondaǵy Ulttyq parkke júgingen bolatyn. Ǵylymı qyzmetkerler halyqty tynyshtandyryp, jaǵdaıdy túsindirmek boldy. Sebebi, biz úshin bul alyp bara jatqan jańalyq emes», - dep jazady Sáken Dildahmet Facebook-tegi paraqshasynda.

Onyń jazýynsha, osydan 4 jyl buryn Bekalka aýylynyń mańynda óli kepter tabylǵan. Qustyń sıraǵynan qara plastık saqına men alty tańbaly nómir, smartfonmen tabýǵa bolatyn gologrammanyń bary anyqtalǵan. Onyń da qanatynda ıeroglıfter jazylǵan. Sol jyly Aqqaınar men Jazaby aýylynda da osyndaı kógershinder kezdesipti.

«Bir qyzyǵy, kógershinder aýlalardaǵy taýyqtarǵa jem beretin oryndarǵa únemi ushyp kelip júrgen. Olar adamdardan múlde qoryqpaıtyn. Biz qytaılyq kógershinderdi zertteı bastaǵan kezde olardyń shynymen de mańyzdy aqparattyń tasymaldaýshysy ekenin anyqtadyq. Biraq olar qupııa aqparatty emes, sporttyq sıpattaǵy jazba. Keıin bilgenimizdeı, ótken ǵasyrdyń 90-shy jyldary kógershin sporty men kógershin totalızatory bıznesi qatty damyp, bul kásip aıtarlyqtaı tabys kózine aınalǵan. Sondaı bıznes damyǵan eldiń biri - kórshimiz Qytaı. Aýqymy jaǵynan kógershin bıznesi at jarystarynan túsetin tabys pen aqshalaı utystardan da asyp túsken», - deıdi ol.

Osylaısha, toqsanynshy jyldary Qytaıda kógershin bıznesi qatty damyp, qus ósirýshiler jarysqa beıim kepterlerdi jappaı ósire bastaıdy. 1984 jyly Qytaıda kógershinder jarysy qaýymdastyǵy qurylsa, 1990 jyldan keıin onda kepterler saıysy ótkizile bastaǵan. Al 2000 jyldan bastap Beıjińde jáne basqa da iri qalalarda joǵary júlde qory bar «Jarys kógershinderi klýby» iske qosylady. Búgin de Qytaıda ondaǵan myń kógershin ósiretin ortalyqtar jumys istep turǵan kórinedi.

Kógershinder jarysy kógershinderdi ustaýǵa jáne jarystar ótkizýge arnalǵan arnaıy qural-jabdyqtar óndirisin yntalandyrǵan. Artynsha kógershinderdi jeke tańbalaýǵa arnalǵan saqınalar, mıkrochıpter, skanerler, kógershinderge elektrondy skanerlengen saǵattar jáne qustardyń naqty ornalasqan jerin ǵarysh arqyly anyqtaıtyn jáne ınternet arqyly tikeleı taratýdy júzege asyratyn mınıatıýralyq navıgatorlar (GPS) shyǵaryla bastaǵan.

Kógershinniń sport tuqymdaryn ósirýdi arnaıy tálimbaq - kógershin fermalary júrgizedi. Olardyń biri Shyńjań-Uıǵyr avtonomııalyq aólkesiniń ortalyǵy - Úrimji qalasynda ornalasqan. Osylaısha, sondaǵy kógershinder týǵan mekeninen 700 shaqyrym jerdegi - Almaty men Shyǵys Qazaqstan oblystaryna deıin ushyp kele bastaǵan. Qustar osy baǵytta mamandandyrylǵan kompanııalar uıymdastyrǵan lotereıalarǵa qatysady. Ol oıyndardyń biri - «Mıllıonǵa júgir» dep atalady», - deıdi Sáken Dildahmet.

Komıtet ókili Katonqaraǵaıda ushyp júrgen «ıeroglıfti» sol kógershinderdiń Qytaıdan jetkenin aıtady.

Foto: www.facebook.com/s.dildakhmet