Katonqaraǵaıǵa áýejaı qashan salynady – mınıstrdiń jaýaby

Úkimet otyrysynda Kólik mınıstri Marat Qarabaev Shyǵys Qazaqstan oblysynyń Katonqaraǵaı aýdanynda áýejaı salý máselesi qarastyrylyp jatqanyn baıandaǵan. Odan keıin ótken baspasóz konferentsııasynda mınıstr atalǵan joba týraly naqtyraq málimet berdi, dep habarlaıdy Kazinform.

«Qarjylandyrý kózi respýblıkalyq bıýdjetten bolady. Óıtkeni ol týrıstik baǵyttaǵy joba, biraq ınvestorlar úshin áli de bir tartymdy baǵyt emes. Sondyqtan qarjylandyrý kózi tek qana respýblıkalyq bıýdjetten bolady.
Áli de osynsha adam ushady, osynsha bolady degen daıyn bir esebimiz joq. Ol tek ákimderdiń aýysqanyna baılanysty emes. Biz Balqashty rettedik, Úsharaldy rettedik, Úrjardy rettedik. Bular – shaǵyn avıatsııa salasy. Sonyń retimen endi Katonqaraǵaıǵa da jetip otyrmyz. Qazir Zaısannyń áýe qatynasynda biraz problemalar bolyp otyr. Birinshi maqsat – sol Zaısandy retteý. Jańa ushý-qoný jolaǵyn salý máselesi bar. Qazirgi turǵan jerinde ári qaraı ony damytaıyq desek, ol jaqta sanıtarlyq jáne basqa da máseleler bar», - dedi mınıstr.

Vedomstvo basshysy jobanyń tezirek iske asýy Katonqaraǵaıda týrızmniń qanshalyqty damıtynyna baılanysty ekenin atap ótti.

«Qazir ol jaqqa bir kompanııa kelip, besjuldyzdy úlken qonaqúı salamyn dep josparlap otyr. Eger sondaı jospar bolsa, onda bolady. Óıtkeni Katonqaraǵaıdaǵy týrızm maýsymdyq bıznes bolyp tur. Úsh aı ǵana isteıdi qazir. Eger shynymen úlken kompanııalar kelip, úlken qonaqúı salyp, týrızm jyl boıy istep turatyn bolsa, respýblıkalyq bıýdjetten ushý-qoný jolaǵyn da salýǵa, termınal salýǵa qarajat bólýge daıynbyz dep turmyz», - dedi Marat Qarabaev.