Qatonqaraǵaıdaǵy órt múgedek áıeldiń ómirin qıyp ketti
ASTANA. QazAqparat - ShQO Qatonqaraǵaı aýdany Katonqaraǵaı aýylyndaǵy úsh qabatty úılerdiń birinen órt shyǵyp, onyń saldarynan múmkindigi shekteýli áıel mert boldy, dep habarlaıdy «QazAqparat» HAA tilshisi.
Bul týraly Shyǵys Qazaqstan oblysynyń Tótenshe jaǵdaılar departamentiniń baspasóz qyzmeti habarlaıdy. Vedomstvonyń aqparatyna sáıkes, oqıǵa ornynda aýdandyq órt sóndirý bólimi bastyǵynyń orynbasary Daryn Saparqanov órt sóndirýshiler kelgenshe adamdardy qaýipsiz jerge kóshirý jumysyn júzege asyrǵan. Oqys oqıǵa jeksenbi kúni tańerteńgi ýaqytta Abaı kóshesindegi 3 qabatty úılerdiń birinde bolǵan. Daryn Saparqanov dál sol úıde turǵan.
«Tilsiz jaýdyń lap etkenin kórgennen keıin men birden órt sóndirý qyzmetin shaqyryp, ot shyqqan orynǵa bet aldym. Órtenip jatqan páterde múgedek áıeldiń turyp jatqanyn biletin edim. Esikti buzyp kirgenimmen, tym kesh bolyp ketipti. Úıge kirgennen keıin órtenip jatqan qoqys pen tósekte otqa oranyp jatqan áıeldiń denesin kórdim. Áriptesterim kelgenshe 1-shi podezdiń turǵyndaryn tolyqtaı syrtqa alyp shyqtym», - deıdi ol.
Arada az ýaqyt ótkennen keıin órt sóndirýshiler kelip, tilsiz jaýdy aýyzdyqtaýǵa kirisken. Jalpy 36 adam syrtqa shyǵarylyp, órt sóndirýshiler ottyń basqa jaqqa taralyp ketpeýin qamtamasyz etken.
«Órttiń taralý aýmaǵy 15 sharshy metrdi quraǵan. Tilsiz jaýdyń týyndaýyna abaısyzdyq nemese elektr qurylǵysyn paıdalaný kezinde qaýipsizdik erejelerin saqtamaý sebep bolýy múmkin. Kináli adam men keltirilgen shyǵynnyń mólsheri anyqtalýy ústinde», - dep habarlaıdy vedomstvodan.
