Katonqaraǵaıdaǵy orman órti oqshaýlandy

ÓSKEMEN. QazAqparat – Shyǵys Qazaqstan oblysy Katonqaraǵaı aýdanynda orman órtiniń taralýy toqtatyldy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, Katonqaraǵaı ulttyq tabıǵı parki Aqsý fılıalynyń aýmaǵynda shyqqan qyzyl jalynnyń beti qaıtty.

«Aldyn ala derek boıynsha Katonqaraǵaı aýdanynyń Sennoe aýylynan 3 shaqyrym jerde, «Katonqaraǵaı ulttyq tabıǵı parki» RMM Aqsý fılıalynyń aýmaǵynda (Ýst-ıAzovskoe ormanshylyǵy) tutanǵan órttiń jalpy aýdany 15 gektardy qurady. Shóp pen butalardy sharpyǵan ot saǵat 14.00-de oqshaýlandy. Órtti sóndirýge TJD-dan 11 adam, orman sharýashylyǵynan 99 adam jáne 3 tehnıka, «Avıaormanqorǵaý» mekemesinen 6 adam jáne jergilikti atqarýshy organnan 7 adam jumyldyryldy», - delingen aqparatta.

Eske salsaq, Shyǵys Qazaqstan oblysynyń Katonqaraǵaı aýdanynda kesheden beri orman órtenip jatqany jaıly jazǵan bolatynbyz.

Eldi mekenderge eshqandaı qaýip tónip turmaǵany da habarlanǵan edi.