Katonqaraǵaıdaǵy Topqaıyń aýylynyń halqy áli kúnge deıin ózennen sý tasyp ishýge májbúr
ÓSKEMEN. KAZINFORM — Shyǵys Qazaqstan oblysy Katonqaraǵaı aýdany Topqaıyń aýyly turǵyndaryn tolǵandyrǵan máseleler az emes. Sonyń ishindegi eń ózektisi — aýyzsýdyń tartylmaýy.
«Bir ózennen adam da, mal da sý ishedi»
Qazir júzge jýyq tútin qalǵan Topqaıyń aýylynyń halqy áli kúnge deıin ózennen sý tasyp ishýge májbúr. Sebebi aýyzsý tartylmaǵan. Eldi mekende jar degende jalǵyz qudyq bar. Keıbireýler sodan sý alsa, aýyldyń jartysynan kóbi ózen jaqqa kúnine shelekpen birneshe ret sabylyp júredi.
— Osy máseleni ákimdikke talaı aıttyq. Sý tartylady dep kele jatqanyna 4 jyl boldy. Senim de qalmaı barady. Buz ózennen adam da, mal da sý iship júr. «Elimiz damyp kele jatyr» dep keýdemizdi kergende myqtymyz, al aýyldaǵy myna jaǵdaıdy nege sheshpeımiz?!, — deıdi turǵyndar.
Budan bólek, topqaıyńdyqtar ınternettiń joqtyǵyna da shaǵymdandy. Aıtýlarynsha, aýylǵa uıaly baılanys munarasy ornatylǵan.
— Dese de uıaly baılanys nashar. Al ınternet degen atymen joq. Osy máselelerdiń qashan jáne qalaı sheshiletindigin bilgimiz keledi, — deıdi aýyl halqy.
Ákimdik ne deıdi?
Osy rette, Kazinform tilshisi Katonqaraǵaı aýdanynyń ákimdigine resmı saýalhat joldady. Aýdan ákiminiń orynbasary Rasýl Karabalınov óz jaýabynda ár máselege qatysty toqtalyp ótti.
— Topqaıyń aýylyndaǵy sý qubyry jelileri men qurylystaryn qaıta jańartý maqsatynda taza sý rezervýary men betondy daıyndaý, qabyrǵalardy, arqalyqtardy, ornatý jáne tutynýshylarǵa jetkizý jumystary 100% aıaqtaldy. Qubyrlardy abonenttik baılaý boıynsha jumystar oryndalyp, barlyǵy 115 kran ornatyldy. Sondaı-aq sý qabyldaǵyshtaǵy 10 qudyqqa 33 saqına ornatylyp, 35 dana órt gıdrantyn ornatý jumystary máresine jetti, — dedi ol.
Rasýl Karabalınovtyń aıtýynsha, Topqaıyń aýylyndaǵy sý qubyry jelilerin iske qosý jáne jóndeý jumystaryn 2025 jyldyń 30 maýsymyna deıin aıaqtaý josparlanǵan.
— 2024 jyly eldi meken mańynda turǵyndardy turaqty uıaly baılanys sıgnalymen jáne joǵary jyldamdyqty ınternetpen qamtamyz etý úshin AMS qurylysy boı kótergen bolatyn. Búgingi tańda qurylys-montajdaý jumystary aıaqtalyp, «Kar-Tel» JShS-men kelisimshart jasaldy. Internet jelisine arnalǵan tıisti qondyrǵylardy ornatý jumystary sáýir aıynda iske asyrylady, — deıdi Katonqaraǵaı aýdany ákiminiń orynbasary.
Eske salsaq, buǵan deıin Katonqaraǵaı aýdanynyń halqy mal soıatyn qasaphana tappaı, qınalyp otyrǵandyǵy habarlanǵan.