Katonqaraǵaıdaǵy mektep TMD-da birinshi bolyp Google mártebesin aldy
ASTANA. KAZINFORM – Shyǵys Qazaqstan oblysynyń eń shalǵaı núktesinde, oblys ortalyǵynan 400 shaqyrym qashyqtyqta ornalasqan Katonqaraǵaı aýdanyndaǵy Órel orta mektebi búginde Ortalyq Azııa men TMD elderi boıynsha bilim berý salasynda úlken serpilis jasap otyr. Bar-joǵy 75 oqýshysy men 28 muǵalimi bar bul shaǵyn bilim ordasy halyqaralyq Google Reference School mártebesin alǵan aımaqtaǵy alǵashqy mektep atandy.
Jasandy ıntellekt pen Google Workspace for Education platformasyn kúndelikti oqý protsesine erkin engizgen aýyl mektebi búginde jahandyq tájirıbe almasý ortalyǵyna aınalǵan.
Mundaǵy ustazdar ózge qalalardaǵy áriptesterimen baılanysý úshin Google Meet qoldansa, sabaq barysynda Gemini quralynyń kómegimen vırtýaldy tájirıbeler jasap, oqý materıaldaryn ár balanyń qabiletine qaraı beıimdeıdi. Al Google Earth baǵdarlamasy aýyl balalaryna mektep partasynda otyryp-aq álemdi vırtýaldy zertteýge múmkindik berip otyr.
Bul aýqymdy jobanyń qalaı bastalǵany jáne onyń mańyzy týraly Bilim berý salasyn turaqty damytý qorynyń dırektory Danııar Toqtarbaev baıandap berdi.
– Biz bul jobany osydan bir jarym jyl buryn Oqý-aǵartý mınıstrligimen birlesip, Google kompanııasymen memorandým aıasynda bastadyq. Jalpy Qazaqstan boıynsha 14 mektep iriktelip qosylǵan edi. Osy baǵdarlamanyń fınaldyq deńgeıi – óte joǵary kórsetkish kórsetken bilim ordasyna Google tarapynan ınnovatsııalyq mektep retinde tanylatyn Google Reference School mártebesin berý edi. 14 mekteptiń ishinen alǵashqy bolyp, tipti búkil Ortalyq Azııa men TMD elderi boıynsha birinshi bolyp bul mártebege Órel orta mektebi ıe boldy, – dedi ol.
Búginde Google-dyń resmı saıtynda Órel mektebiniń arnaıy paraqshasy ashylyp, mundaǵy ustazdardyń Gemini AI, NotebookLM, Workspace, Classroom baǵdarlamalary boıynsha sarapshylyq bilimi bar ekeni halyqaralyq deńgeıde bekitilgen. Endi álemniń kez kelgen núktesindegi mektepter Katonqaraǵaıdyń muǵalimderimen baılanysyp, tájirıbe almasa alady.
Lenovo kompanııasynyń qoldaýymen mektep ChromeOS júıesindegi zamanaýı hrombýktarmen jabdyqtalǵan. Bul qurylǵylar balalardyń aýa raıyna qaramastan, úıde nemese qalada bolsa da birlesip bilim alýyna jaǵdaı jasady.
Jańa tehnologııalardyń mektepke ákelgen serpilisi men muǵalimderdiń kásibı ósýi týraly Órel orta mektebiniń matematıka páni muǵalimi Madına Ahmerova maqtanyshpen bólisti
– Mektebimizge berilgen jańa hrombýktar oqýshylar úshin tehnologııa álemine ashylǵan tereze boldy. Eń úlken maqtanyshymyz – 28 ustazymyz túgeldeı Google Education komandasynyń qoldaýymen arnaıy kýrsty aıaqtap, halyqaralyq deńgeıdegi Google Creator sertıfıkatyn ıelendi. Qazir olar tsıfrlyq tehnologııany kásibı meńgergen myqty trenerlerge aınaldy. Jasandy ıntellekt bizdi qaǵazbastylyq pen kúndelikti kúıbeń tirlikten qutqardy. Ásirese oqý jylynyń sońynda ár balanyń deńgeıine saı tapsyrmalar men testter daıyndaýda JI-diń kómegi zor. Keıde oqýshynyń matematıkalyq esepti meniń túsindirgenimnen emes, JI arqyly jasalǵan ınteraktıvti oıyn arqyly tez ári jeńil uǵynyp ketetin kezderi bolady, – deıdi muǵalim.
Zamanaýı quraldar qanshalyqty damyǵanymen, ol ustazdyń ornyn basa almaıdy. Madına Ahmerovanyń aıtýynsha, bilim berý tek aqparat berýmen shektelmeıdi – ol tiri qarym-qatynasty, meıirimdilik pen tárbıeni talap etedi.
– Biraq JI-di meńgergen ustaz, ony qoldanbaıtyn muǵalimdi almastyratyny anyq, – deıdi ol.
Aýyl balalarynyń álemdik deńgeıdegi zamanaýı bilimge qol jetkizýi halyqaralyq sarapshylardy da beıjaı qaldyrmaǵan. Jobanyń nátıjesine tańǵalǵan Google Education dırektory Anna hanym Londonnan Katonqaraǵaıdyń taýly aımaǵyndaǵy Órel aýylyna arnaıy kelip, ınnovatsııalyq mektep taqtaıshasyn óz qolymen tabystaǵan.
– Jobany bastamas buryn Ulybrıtanııa, Polsha, Bolgarııaǵa baryp, tájirıbe zerttedik. Al 1,5 jyldyq eńbektiń nátıjesin kórip, Londonnan Anna hanymnyń ózi Órelge kelgende kóz jasymdy tyıa almadym. Men London men Polshanyń balalaryn kórgende, bizdiń qara domalaq balalarymyz qashan osylaı erkin sóılep, synı oılaıdy dep armandaǵan em. Bizdiń oqýshylarymyz da búgin solardan kem emes dep balalarǵa sóz sóılegende tamaǵyma óksik tyǵyldy. Jobalyq oqytýdyń máni de osynda – sońǵy nátıje emes, balanyń sol nátıjege qalaı jetkeni mańyzdy, – deıdi Danııar Toqtarbaev sol sáttegi tebirenisti sátti eske alyp.
Jaqynda Memleket basshysynyń orta mektepterge jasandy ıntellekti engizý týraly Jarlyqqa qol qoıǵan edi.
Sarapshylardyń pikirinshe, bul óte der kezinde qabyldanǵan sheshim. Qoǵam JI quraldaryn belsendi qoldanyp jatqan zamanda, mektep ýaqyt kóshinen artta qalmaı, ony oqýshyny baǵalaý men oqytýda oryndy paıdalaný erejelerin aıqyndaýy tıis.
Aıta keteıik, buǵan deıin, Astanalyq mektep oqýshylary qarttar men dárigerlerge kómektesetin JI-robottar oılap tapqan edi.
