Katonqaraǵaıda týrızmniń jańa túri qolǵa alyndy
ASTANA. QazAqparat - Katonqaraǵaı aýdanynda mádenı-tanymdyq týrızmdi damytý qolǵa alyndy, dep jazady Altaınıýs.
Aýdan ákimi Ahmetqalı Nurǵojınnyń aıtýynsha, osy baǵyttaǵy negizgi jumystar kásipkerlerdiń óz qarajaty esebinen júrgizilmek.
Sońǵy jyldary tabıǵaty kórkem bul óńir Berel qorǵanyndaǵy arheologııalyq qazba jumystary kezinde tabylǵan qundy jádigerleri arqyly elimizdiń ǵane emes, álemniń de týrısteriniń nazaryn ózine aýdartty. Sonymen qatar, Rahman qaınary, Muztaýmen tanylǵan óńirde mádenı-tanymdyq týrızmdi damytý qıynǵa soqpas.
Jyl saıyn júzdegen týrıst aǵylatyn Katonqaraǵaı aýdanynda bıyl «Temirlan» demalys bazasynyń «Baıan» saýyqtyrý keshenin keńeıtý jumystary da júzege asyrylmaq. Sondaı-aq, Belqaraǵaı aýylynda pantymen emdeý ortalyǵy ashyldy.
