Katonqaraǵaıda ormanshylar belýardan qar keship, jabaıy janýarlardy qorektendirip júr
ÓSKEMEN. KAZINFORM — Shyǵys Qazaqstan qalalarynda kóktemniń alǵashqy belgileri baıqala bastaǵanymen, Katonqaraǵaı memlekettik ulttyq tabıǵı parkinde qystyń beti áli qaıtqan joq.
Qalyń qar men aıaz túz taǵylarynyń tirshiligin edáýir qıyndatqan. Osyǵan baılanysty park qyzmetkerleri olardy qosymsha qorektendirý jumystaryn jalǵastyryp jatyr.
Ormanshylar ózderine bekitilgen aýmaqtardy kún saıyn patrýldeıdi. Qıyn ótkelderden ótip, keı jerlerde belýardan qar keshýge týra keledi. Sondyqtan mamandar kóbine atpen júredi.
Aýmaqty aralaý kezinde mamandar tek tabıǵı ortanyń jaı-kúıin baqylap qana qoımaı, bıotehnıkalyq sharalar da júrgizedi. Olar jem salatyn oryndardy shóppen, butaq azyǵymen jáne tuzben tolyqtyryp otyrady. Bul tabıǵı qorek kózderi qalyń qardyń astynda qalyp, janýarlarǵa qoljetimsiz bolǵan kezde olardyń tirshiligin saqtaýǵa kómektesedi.
— Qosymsha qorektendirý ásirese qystyń sońy men kóktemniń basynda asa mańyzdy. Osy ýaqytta janýarlarǵa azyq tabý qıyndaıdy, óıtkeni qar áli qalyń jatady, al shóp pen butalarǵa jete almaıdy, — deıdi ulttyq park qyzmetkerleri.
Jumys park aýmaǵynyń ár bóliginde, sonyń ishinde Arshaty ormanshylyǵynda da júrgizilip jatyr. Munda janýarlardy qorektendirý jumystary ınspektorlardyń turaqty baqylaýynda.
Jem salatyn oryndardyń mańyna ornatylǵan fototuzaqtar ol jerge elikter men jabaıy qabandardyń jıi keletinin kórsetip otyr.
Eske salsaq, osyǵan deıin Katonqaraǵaı aýdanynda 4 ilbis fototuzaqqa túsip qalǵany habarlanǵan.
