Katonqaraǵaıda ormannan shyqqan órt 4 kúnnen keıin tejeldi

ÓSKEMEN. QazAqparat – Shyǵys Qazaqstan oblysy Katonqaraǵaı aýdanyndaǵy orman aýmaǵynda shyqqan órt 4 kúnnen keıin tejeldi, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, 18 shildede Katonqaraǵaı aýdanynyń Berel ormanshylyǵynda órt shyqqan.

Taýly jerde aǵashtar men shóp jandy.

«Tehnıkanyń jetýi qıyn taýly, jartasty jerdi sharpyǵan otpen kúresý qıynǵa soqty. Qutqarýshylar órttiń ary qaraı taralýyna jol bermes úshin taý-tasty kezip, bar kúsh-jigerimen bıikke kóterilip otyrdy. Sonyń nátıjesinde, 22 shildede saǵat 11.00-de órt tejeldi. Tilsiz jaýdyń jalpy aýdany shamamen 7 gektardy quraǵan», - delingen aqparatta.

Órtti aýyzdyqtaýǵa ormanshylar, órt sóndirýshiler men jergilikti atqarýshy organdardan 155 adam men 13 tehnıka, Qorǵanys mınıstrliginiń, ShQO avıabólimshesi men «Qazavıaormanqorǵaý» mekemesiniń 3 tikushaǵy jumyldyrylǵan.