Katonqaraǵaıda laqtarymen júrgen taýeshkiler fototuzaqqa túsip qaldy

Ulttyq park aýmaǵyndaǵy fototuzaqtar taǵy da qyzyqty kadrlardy tirkedi.

- Kadrlardan atalyq, analyq taýeshkiler jáne ósip kele jatqan laqtar birge kórinedi. Atalyqtaryn iri ári kólemdi múıizderinen ońaı ajyratýǵa bolady, al analyqtarynyń múıizderi aıtarlyqtaı kishi, - dep habarlady Katonqaraǵaı ulttyq parkinen.

Tóldegennen keıingi taýeshkilerdiń minez-qulqy da qyzyq. Eresek atalyqtar kóbine toptan bólinip ketse, jas atalyqtar analyqtar men laqtardyń janynda júre beredi.

- Sondyqtan keıde fototuzaq obektıvine eresek janýarlar men tólderi birge júrgen osyndaı «otbasylyq» kadrlar túsip qalady. Fototuzaqtar janýarlardy úrkitpeı, olardyń tabıǵı tirshiligine aralaspaı osyndaı sátterdi baqylaýǵa múmkindik beredi. Bul kadrlar parktiń jabaıy janýarlaryn baqylap júrgen ormanshy Jomart Amanbaevtyń eńbeginiń arqasynda túsirildi, - delingen aqparatta.

Eske salsaq, osyǵan deıin Qarqaraly ulttyq parkiniń fototuzaǵyna bulan ilikkenin jazǵanbyz.