Katonqaraǵaıda qar barysy fototuzaqqa túsip qaldy
ASTANA. KAZINFORM - Katonqaraǵaı memlekettik ulttyq tabıǵı parkinde qar barysy fototuzaqqa túsip qaldy. Bul týraly Ekologııa mınıstrligi habarlady.
«Sırek kezdesetin jyrtqyshty Arshaty ormanshylyǵynda ornatylǵan fototuzaqqa túsirip alǵan. Bul janýar túri kúsh pen erkindiktiń sımvoly — parktiń naǵyz maqtanyshy. Árbir osyndaı kadr Katonqaraǵaı ulttyq tabıǵı parkiniń janýarlardy qorǵaýdaǵy mańyzdylyǵyn eske salady», - delingen mınıstrlik habarlamasynda.
Mamandardyń aıtýynsha, Qazaqstanda qar barysynyń sany turaqty túrde ósip keledi. Búginde elimizde shamamen 190 ilbis bar. Ekologııa jáne tabıǵı resýrstar mınıstrligi, sonymen qosa qar barysyn qorǵaýmen aınalysyp júrgen mamandardyń qoldaýymen elimizdegi 15 erekshe qorǵaýǵa alynǵan aýmaqta barlyq jaǵdaı jasaldy. Qazirgi tańda ulttyq tabıǵı parkter men qoryqtar atalǵan janýarlar úshin qaýipsiz.