Katonqaraǵaıda ınternettiń nasharlyǵy týrızmniń damýyna qolbaılaý bolyp tur
ÓSKEMEN. KAZINFORM — El arasynda «ekinshi Shveıtsarııa» atanyp ketken Katonqaraǵaıdyń negizgi týrıstik aýyly — Berel. Oǵan Qazaqstannyń túkpir-túkpirinen ǵana emes, shetelden de keletinder bar. Alaıda áli kúnge deıin aýylda ınternet durys ustamaıdy.
«Bir-birinen qolma-qol aqsha surap turady»
Katonqaraǵaıǵa týrısterdi týr arqyly tasıtyn kásipker Asqar Amangeldiniń (óziniń suraýy boıynsha aty-jóni ózgertilip berildi) aıtýynsha, qazirgi eń kúrdeli másele — ınternettiń nasharlyǵy.
— Katonqaraǵaıdaǵy keıbir aýyldar áli kúnge deıin ınternetpen qamtylmaǵan. Sonyń biri — Topqaıyń. Al basty týrıstik baǵyttardyń biri sanalatyn Berel aýylynda ınternet jyldamdyǵy óte nashar, — deıdi ol.
Sonyń saldarynan halyq dúkenniń mańynda bir-birinen qolma-qol aqsha surap turady.
Sebebi ınternet baılanysy nashar bolǵandyqtan banktik mobıldi qosymshalar jumys istemeıdi.
— Halyq týrısterden paıda kórýi úshin qurt-maı satady. Biraq munyń bári qolma-qol esep aıyrysýmen ǵana júzege asady. Sol úshin Katonqaraǵaıǵa demalýshylar kóptep kelýi úshin ınternet máselesin qolǵa alý kerek, — deıdi kásip ıesi.
Týrısterdi 21 úı qabyldap otyr
Máseleniń qalaı sheshiletinin bilý úshin Katonqaraǵaı aýdany ákimdigine resmı saýalhat joldadyq.
Jaýap bergen aýdan ákiminiń orynbasary Rasýl Qarabalınovtyń málimetinshe, Berelde 3G jyldamdyqty mobıldi ınternet ustaıdy.
— Berel aýylynda antenna-machtalyq qurylymnyń qurylys jumystary tolyqtaı aıaqtalǵan. Atalǵan aýmaqta 3G jyldamdyqty mobıldi ınternet jumys isteıdi. Qazirgi ýaqytta ınternet jelisiniń qýatyn arttyrý maqsatynda oblystyq Tsıfrlandyrý basqarmasyna tıisti hattar joldandy, — deıdi ol.
Búginde aýylda barlyǵy 21 úı týrısterdi qabyldap otyr. 2024 jyldyń qortyndysy boıynsha eldi mekenge 8 745 týrıst kelgen.
Olardyń arasynda 8 adam shet memleketten. Naqty aıtqanda, AQSh pen Reseıden.
— Týrısterdiń qyzyǵýshylyqtaryn arttyrý maqsatynda osy jyly kelýshilerdiń bos ýaqyttaryn paıdaly ótkizý úshin sadaq atý, atpen serýendeý syndy kóptegen qazaq oıyndaryn uıymdastyrý josparlanǵan, — deıdi Rasýl Qarabalınov.
Eske salsaq, osyǵan deıin Shyǵys Qazaqstanda shekaradaǵy aýyl «qytaı ınternetin» paıdalanyp otyrǵanyn jazǵanbyz.