Katonqaraǵaıda eko-qonaqúı salynady

Shyǵys Qazaqstan oblysynyń ákimi Ermek Kósherbaev óńirdiń týrıstik áleýetin damytý sharalary týraly aıtyp berdi, dep habarlaıdy Kazinform agenttigi.

«Kásipkerlik týraly aıtqanda týrızmdi aıtpaý múmkin emes. Týrızm basqa da qosymsha 50-den astam salany damytady. Bul baǵytta biz eki máselege nazar aýdaramyz. Birinshiden, joldar – oblysta orman qory kóp. Ókinishke oraı, qoldanystaǵy zańnamaǵa sáıkes, orman qory jerlerinde jol salýǵa tyıym salynǵan. Shyǵys Qazaqstanda kóptegen týrıstik aımaqtar orman qory jerlerinde nemese taýly jerlerde ornalasqan. Bul máseleni bizdiń aımaqqa issaparmen kelgen Úkimet basshylaryna jetkizip, qoldaý taptyq. Búgingi tańda tıisti mınıstrliktermen birlesip sheshý jolyn izdep jatyrmyz», - dedi E. Kósherbaev Ortalyq kommýnıkatsııalar qyzmetinde ótken baspasóz máslıhatynda.

Sondaı-aq, ákimniń aıtýynsha, oblysty brendke aınaldyratyn is-sharalar qolǵa alynǵan. Osy baǵytta ulttyq dástúrdi damytatyn sharalar, haıkıngter, jazǵy festıvaldar ótkizilýde.

«Qatonqaraǵaı aýdanynda qonaq úı bıznesiniń iri halyqaralyq operatory «TOR're» kompanııasynyń eko-qonaq úıiniń qurylysy bastalady. Mundaǵy kásipker Serik Tolyqpaev – Qatonqaraǵaı aýdanynyń týmasy. Oblystyń tabıǵı áleýetin jáne klımattyq erekshelikterin paıdalanyp, qysqy sport túrleri úshin týrıstik jáne sporttyq ınfraqurylymdy jaqsartý boıynsha jumys istemekpiz», - deıdi oblys ákimi.

Sondaı-aq Buqtyrma jaǵalaýynyń ınfraqurylymyn jaqsartyp, jazǵy týrızm túrlerin damytý josparda bar.

«Bıyl týrızmge salynatyn salymdar ótken jylǵy kórsetkishten 36%-ǵa ósip, 15 mlrd teńgeni qurady, kelesi jyly bul salaǵa 18 mlrd teńgeden astam qarajat josparlanýda», - dedi E. Kósherbaev.

Aıta keteıik, Ermek Kósherbaev elordada Shyǵys-Qazaqstan oblysynyń áleýmettik-ekonomıkalyq damýy týraly esep berip jatyr.

Buǵan deıin óńir basshysy Shyǵys Qazaqstan oblysyndaǵy ortasha jalaqy 305 myń teńge ekenin aıtqan edi.

Sondaı-aq, Shyǵys Qazaqstan oblysynda eki sý qoımasy jańǵyrtylady jáne jańa sý qoımasy salynady.