Katonqaraǵaıda eki jabaıy qaban men toraılary fototuzaqqa ilikti
ASTANA. KAZINFORM — Katonqaraǵaı ulttyq parkiniń aýmaǵynda ornatylǵan fototuzaqqa eki analyq qaban men toraılar túsip qaldy. Beınejazbada jabaıy janýarlardyń shalshyq sýda júrgeni baıqalady.
— Beınejazbaǵa qarasańyz, orman ishindegi naǵyz balabaqshany kórgendeı bolasyz: eki analyq jáne aınalasynda bir top toraı júr. Olar sý jınalǵan laıly shalshyqtyń mańynda erkin júrip, tabıǵı tirshiligin jalǵastyryp jatyr, — delingen habarlamada.
Ulttyq park baspasóz qyzmetiniń málimetinshe, qabandar úshin mundaı laıly shalshyqtar dene qyzýyn retteýge, ystyq kúnderi salqyndaýǵa jáne túrli jándikterden qorǵanýǵa kómektesedi. Sondyqtan mundaı oryndar jabaıy shoshqalardyń tabıǵı meken etý ortasynyń mańyzdy bóligi.
Park qyzmetkerleri mundaı kadrlar jabaıy janýarlardyń tirshiligin baqylap ǵana qoımaı, olardyń popýlıatsııasynyń jaı-kúıin baǵalaýǵa múmkindik beretinin aıtady.
Bul joly fototuzaq obektıvi naǵyz «orman balabaqshasyn» túsirip alǵan. Kadrlarǵa qaraǵanda, eki analyq qabannyń da tóli kóp. Mamandar muny ulttyq parktegi jabaıy shoshqa popýlıatsııasy úshin jaqsy belgi dep baǵalap otyr.
– Fototuzaq materıaldary janýarlardyń tabıǵı ortadaǵy minez-qulqyn olardyń tirshiligine aralaspaı baqylaýǵa múmkindik beredi. Mundaı baqylaýlar aýmaqtyń bıoalýantúrliligin monıtorıngileýde mańyzdy ról atqarady, – dep atap ótti ulttyq park ókilderi.
Katonqaraǵaı ulttyq parki elimizdegi eń iri tabıǵatty qorǵaý aýmaqtarynyń biri bolyp qala beredi. Munda janýarlardyń ondaǵan túri mekendeıdi, olardyń kópshiligi adam kózine óte sırek kórinedi. Sondyqtan fototuzaqqa túsken árbir jańa kadr Shyǵys Qazaqstannyń jabaıy tabıǵatynyń qupııa tirshiligine ashylǵan tereze ispetti.
Aıta keteıik, buǵan deıin Ústirt memlekettik tabıǵı qoryǵy aýmaǵynda asa sırek kezdesetin qabylan fototuzaqqa túsken bolatyn.
