Katonqaraǵaıda demalý úshin qansha qarajat kerek
ASTANA. QazAqparat - Katonqaraǵaı kórikti mekenderdiń kósh basynda. Endeshe sol jerge bir kelýge qumartqan aǵaıyn qalaı jetedi? Bul týraly QazAqparat altaynews -qa silteme jasap habarlaıdy.
Jetýdiń joly kóp. Mysaly, saıahatshy astanalyq nemese almatylyq bolsyn deıik. Ol áýeli Óskemen qalasyna kelýge tıis. Bılet saýdasymen aınalysatyn tanymal saıttardyń jazýynsha, ushaq quny 20 myń men 80 myńnyń arasynda qubylyp turady. Avtobýs bıletiniń quny 6-8 myń, poıyz bıletiniki 4-7 myń teńge shamasynda. Keıingi eki kólikpen shyqsańyz, jolǵa bir táýlik ýaqyt arnaýǵa týra keledi. Al jeke kólikpen shyǵamyn degen aǵaıyn bolsa, másele basqa... Ushaqpen bir jarym saǵatta kelip jetýge bolady.
Óskemennen ary qaraı qalaı barady?
«Onda poıyzben, ushaqpen barýdyń múmkindigi joq. Avtobýs, áıtpese taksı», - deıdi Katonqaraǵaı aýdany kásipkerlik, ónerkásip jáne týrızm bóliminiń bas mamany Eldar Medıev. - Jol ekeý. Jıhangezimiz tek qana taýdyń ishin aralap baramyn dese, Zyrıan aýdanyndaǵy ıir-ıir serpantınmen ótedi. Al taýmen birge sýdy, jazyq dalany da kóreıin dese, Samar aýylyn basyp, odan ári Buqtyrma ózeninen parommen júzip, Katonqaraǵaı aýdanynyń ortalyǵy arqyly barady. Óz basym sońǵy jolmen júrýge keńes berer edim. Ol ári qyzyqty, ári minsiz. Eki jaqtyń da uzaqtyǵy birdeı - shamamen aýdan ortalyǵy Úlken Narynǵa deıin - 350, odan ary demalys oryndaryna deıin 100-150-deı shaqyrym.
Katonqaraǵaıǵa jettińiz. Saıahatshynyń endigi taban tirer orny qaısy?
Eldar Medıev usynǵan Katonqaraǵaıdaǵy shıpajaılar men demalys oryndarynyń bir-ekeýine toqtalyp óteıik.
«Rahman qaınary» shıpajaıy. Jaraly ańnyń aıaǵy sýǵa bir matyrǵannan saýyǵyp ketetin shıpaly arasan osy. Onda 40-tan astam turǵynúı bar. Qonaqúı bólmeleriniń baǵasy 7 000 teńgeden bastalyp, 11 000, 15 000 dep kete beredi. Al kottedjder 30 myńnan joǵary. 150 myńǵa deıin.
«Maraldy» pantymen emdeý kesheni. Kelýshiler maral múıiziniń sorpasyna, ıaǵnı bulaýǵa túsedi. Munda 20 adamǵa shaqtalǵan jatyn orny bar. Úsh ýaqyt qunarly tamaq beriledi. Joldama aqysy 19-20 myń teńgeniń kóleminde.
«Osy oraıda Katonqaraǵaıdyń bal qymyzy jaıly aıtpaı ketýge bolmas. Iá, muqym el aýzynyń sýy quryp maqtaıdy. Qymyz bul jaqtaǵy kez kelgen demalys ornynan tabylady. Lıtri 350 teńgeden bastalady. Sondaı-aq, qazaqtyń aımúıiz jazýshylary ásemdigin jabyla jazǵan sulý tabıǵat aıasynda jylqymen serýendeýge de bolady. Bulttyń ózi tabanyńyzdyń astynda júzip júredi», - deıdi Eldar Medıev.
