Katonqaraǵaıda aıýlar qysqy uıqydan turdy

ÓSKEMEN. KAZINFORM – Shyǵys Qazaqstan oblysyndaǵy Katonqaraǵaı memlekettik ulttyq tabıǵı parkinde aıýlar qysqy uıqydan oıanyp, inderinen shyǵa bastady.

Qoryq qyzmetkerleri ornatqan fototuzaqtardyń birine qońyr aıý túsip qalǵan. Ormanshy Jomart Amanbaev ornatqan kamera ádette maraldar keletin sortań mańynda janýarlardy tirkegen. Alaıda bul joly kadrǵa qysqy uıqydan keıin belsendi túrde qorek izdeı bastaǵan aıý da ilingen.

Ulttyq park mamandarynyń aıtýynsha, kóktemgi kezeń jabaıy janýarlar úshin eń kúrdeli ýaqyttardyń biri. Uzaq uıqy men azyq tapshylyǵynan keıin olar álsirep, qosymsha qorekke muqtaj bolady.

- Biz aldyn ala sortańdardy daıyndap, qystan keıin jańartyp otyramyz. Bul tuz ben mıneraldy qospalar qaldyrylatyn arnaıy oryndar. Olar janýarlardyń qysqy uıqydan keıin tezirek qalpyna kelýine, aǵzasyn nyǵaıtýyna jáne tabıǵı qorek áli jetkiliksiz bolatyn kóktem mezgilinen aman ótýine kómektesedi, - deıdi Katonqaraǵaı ulttyq parkiniń qyzmetkerleri.

Mıneraldy qorek ásirese kóktemniń basynda mańyzdy, sebebi taýlarda áli qar jatady, al ósimdikter endi ǵana kókteı bastaıdy.

Eske salsaq, osyǵan deıin Pavlodar oblysynda muz qursaýynan qutqarylǵan aqqýlar aıdynyna oralǵany habarlanǵan.