Katonqaraǵaıda aýyl sharýashylyǵy tehnıkasyn alýǵa 1 mlrd teńgeden astam ınvestıtsııa quıyldy
Bul týraly aýdan ákimi Dildar Qalıqan «Memleket basshysynyń tapsyrmalary sheńberinde Katonqaraǵaı aýdanynyń áleýmettik-ekonomıkalyq damýy» taqyrybynda ótken baspasóz konferentsııasynda málim etti.
«Aýdannyń áleýmettik-ekonomıkalyq jaǵdaıynyń barlyq kórsetkishinde ósim bar. Onyń ishinde agroónerkásiptik keshen salasy da damý ústinde. Bul Katonqaraǵaıdaǵy eń negizgi salalardyń biri. Sebebi jergilikti halyq jer qunarlyǵynyń arqasynda sapaly ónim alyp, mal ustap tabys taýyp otyr. Jyl basynan beri arnaýly aýyl sharýashylyǵy tehnıkalaryn satyp alýǵa 1 mlrd 40 mln teńgege ınvestıtsııa quıyldy», - deıdi ol.
Bıyl egistik alqaby – 65 myń gektardy qurady. Onyń ishinde maıly daqyldar – 18 myń gektar.
«Halyqty sapaly aýyzsýmen qamtý úshin birqatar joba iske asyrylýda. Atap aıtqanda, Topqaıyń aýylynda jańa sý qubyryn salý jumystary osy jyly aıaqtalmaq. Jambyl, Maıemer, Balǵyn Órnek aýyldarynda qubyrlardy aǵymdaǵy jóndeý jumystary júrgizilýde. Jolǵa qatysty aıtar bolsaq, 2022 jyldyń sońyna deıin Úlken Naryn, Solonovka, Altynbel aýyldarynyń kóshelerin asfalttaý jumystary óz máresine jetedi. Sondaı-aq Berel qorymyna aparatyn 10 shaqyrym jolǵa asfalt tóselýde», - deıdi Dildar Qalıqan.