Katonqaraǵaı parkinde fototuzaqqa ilikken Sibir taýtekesi men Altaı ularynyń sýreti jarııalandy
ÓSKEMEN. KAZINFORM – Katonqaraǵaı memlekettik ulttyq tabıǵı parkinde qys mezgilinde túsirilgen fototuzaq kadrlary kópshiliktiń erekshe qyzyǵýshylyǵyn týdyrdy.
Negizinen obektıvke ilikkeni – sibir taýtekeleri. Olar rejıssersiz túsirilgen, kókpen talasqan asqar taýlardaǵy «telehıkaıanyń» negizgi qaharmandaryna aınalyp otyr.
Katonqaraǵaı memlekettik ulttyq tabıǵı parkiniń qyzmetkerleriniń málimetinshe, bul joly alynǵan 70-ten astam beınematerıaldyń basym bóliginde taýtekeleri beınelengen. Kadrlar olardyń qys mezgilindegi belsendi tirshiligi men jýyrda ótken kúıleý kezeńinde túsirilgen.
– Keıde bul jaı ǵana baqylaý emes, naǵyz telehıkaıa sııaqty áser qaldyrady. Ózine baýrap alatyn basty keıipker, aılaker qarsylastar da bar, - deıdi park mamandary.
Beınematerıaldardyń birinde alǵash ret bir kadrda sibir taýtekesi men QR Qyzyl kitabyna engen sırek qus – Altaı ulary qatar túsirilgen. Ǵalymdardyń aıtýynsha, mundaı sáttiń ǵylymı qundylyǵy óte joǵary.
Fototuzaqtar ádettegi daladaǵy baqylaý barysynda tirkeý múmkin emes sátterdi kórýge múmkindik beredi. Qysqy túsirilimder taýtekelerdiń tabıǵattyń qatań kezeńindegi ómirimen tuspa-tus kelgen. Ádette bir topta eresek atalyq, birneshe analyq jáne ótken jylǵy tólder bolady.
Sarymsaqty jáne Altaı Tarbaǵataıy jotalarynda ornatylǵan fototuzaqtar jyl boıy úzdiksiz jumys isteıdi. Olar kúıleý kezeńin, kóshý baǵyttaryn, janýarlar sanyn naqtylaýǵa ǵana emes, túz taǵylaryn qorǵaý jumystarynyń nátıjesin kórýge de múmkindik beredi.
Bul joly park qyzmetkerleri kadr syrtynda qalyp qoıatyn jandardy da kórsetýdi jón kórgen. Jarııalanǵan vıdeolardan qalyń qarǵa, aq tuman men azynaǵan aıazǵa qaramastan, bıik taýda fototuzaqtardy ornatyp, qyzmet kórsetip júrgen mamandardy kórýge bolady.
– Qardy ombylap, birneshe shaqyrym taýǵa kóterilý, sodan keıin qural-jabdyqty dál baptaý – biz úshin kúndelikti jumys. Keıde kameraǵa túspeý úshin aınalyp ótýge de shama bolmaı qalady, - deıdi mamandar.
Vıdeolarda Vladımır Vorobev, Bolat Kóbeshov jáne Jomart Amanbaev kórinis tapqan. Dál osy mamandar apta boıy taýda eńbek etip, keıin kórermenderge Altaıdyń jabaıy tabıǵatynan biregeı kórinister usynady.
Ulttyq park ókilderi bul kadrlardyń jaı ǵana ásem kórinis emes, ǵylymı jáne daladaǵy tynymsyz eńbektiń nátıjesi ekenin atap ótti. Aldaǵy ýaqytta da olar shynaıy ári sırek kezdesetin osyndaı áserli sáttermen bólisýdi jalǵastyrmaq.
Eske salsaq, osyǵan deıin Ertis ormanynan qysta qandaı qustardy kezdestirýge bolatyny týraly jazǵanbyz.