Katonqaraǵaı ulttyq parkinde shyqqan órtti aýyzdyqtaýǵa tikushaqtar tartyldy
ÓSKEMEN. KAZINFORM – Shyǵys Qazaqstan oblysy Katonqaraǵaı memlekettik ulttyq tabıǵı parkiniń Aqsý fılıaly aýmaǵynda shyqqan órt sóndirilip jatyr.
Órt teńiz deńgeıinen shamamen 1400 metr bıiktikte ornalasqan, jetýi qıyn taýly aýmaqta shyqqan. Tilsiz jaýdy aýyzdyqtaýǵa ShQO Tótenshe jaǵdaılar departamentiniń, orman sharýashylyǵynyń, ulttyq parktiń jáne avıatsııanyń kúshteri jumyldyryldy. Qazirgi ýaqytta oqıǵa ornynda barlyǵy 78 adam jumys isteýde. Onyń ishinde 54 orman sharýashylyǵy qyzmetkeriniń 19-y atpen júr.
- Órtti sóndirý operatsııasyna tartylǵan barlyq áýe tehnıkalary iske qosyldy. «Qazavıaqutqarý» AQ-nyń sý tógý qurylǵysymen jabdyqtalǵan ES-145 tikushaǵy tórt ret sý shashyp, jalpy kólemi 2400 lıtr sýdy tókti. Semeı qalasynan ushqan Mı-8 tikushaǵy órt oshaǵyna jalpy kólemi eki tonna bolatyn eki sý syıymdylyǵyn jetkizip, kúshter men tehnıkany tasymaldaýdy qamtamasyz etti. Tańǵy saǵat 03:30-dan bastap Shyǵys Qazaqstan oblysy ákimdiginiń tikushaǵy da jumysqa kiristi, - dep habarlady oblys ákiminiń baspasóz qyzmetinen.
Ekıpaj órt oshaǵyna 45 desantshyny jetkizgen. Órt oshaǵyna eń jaqyn sý kózi – Maraldy kóli shamamen 30 shaqyrym qashyqtyqta ornalasqandyqtan, árbir ushý aıtarlyqtaı ýaqytty talap etken.
- Soǵan qaramastan ekıpaj segiz márte sý tógip, Aqbulaq ózeni mańyndaǵy aýmaqta órttiń taralýyn oqshaýlaýǵa jáne onyń ary qaraı jaıylýyna jol bermeýge múmkindik jasady. Avıatsııanyń jumysy keshki saǵat 20:00-ge deıin jalǵasty. Búgin tańerteńgi jaǵdaı boıynsha ashyq jalyn oshaqtary tirkelgen joq. Qazir mamandar órttiń jekelegen ýchaskelerine sý shashyp, shetki aýmaqtaryn óńdeý jumystaryn júrgizýde jáne jalynnyń qaıta tutanýyna jol bermeý úshin táýlik boıy monıtorıng uıymdastyrylǵan, - delingen aqparatta.
Eske salsaq, osyǵan deıin ShQO ormandarynda jaz shyqqaly beri 30-ǵa jýyq órt tirkelgeni habarlanǵan.
