Katonqaraǵaı órt qaýpine baılanysty týrıster úshin ýaqytsha jabyldy

ASTANA. KAZINFORM — Shyǵys Qazaqstannyń eń kórkem óńirleriniń biri — Katonqaraǵaı ulttyq tabıǵı parkinde orman órtiniń joǵary qaýpine baılanysty ýaqytsha shekteýler engizildi.

Park ákimshiliginiń habarlaýynsha, 28 shildeden bastap Katonqaraǵaı ulttyq parki aýmaǵynda órt qaýpiniń besinshi klasy tirkelgen. Aýa raıynyń ystyq ári qurǵaq bolýyna baılanysty orman alqaptarynda órt shyǵý qaýpi joǵary. Osyǵan baılanysty memlekettik orman qory aýmaǵynda adamdardyń júrýine shekteý qoıý týraly sheshim qabyldandy. Bul shara óńirdegi tótenshe órt jaǵdaıynyń aldyn alý maqsatynda engizilip otyr.

— Katonqaraǵaı memlekettik ulttyq tabıǵı parki aýmaǵynda 5-shi tótenshe orman órti klasynyń turaqty ornaýyna baılanysty, órt qaýipsizdigi qaǵıdalarynyń 17-tarmaǵy, 9-tarmaqshasyna sáıkes, jeke tulǵalardyń memlekettik orman qory aýmaǵynda bolýyna shekteýler engiziledi. Ormanda órt qaýipsizdigi erejelerin qatań saqtaýǵa shaqyramyz, — delingen habarlamada.

Qazirgi tańda shekteýlerdiń naqty qashan alynatyny belgisiz. Bul aýa raıynyń ózgerýine jáne órt qaýpi deńgeıiniń tómendeýine qaraı sheshiletin bolady.

Aıta keteıik, buǵan deıin besinshi deńgeıdegi órt qaýpi Almatyda jáne eldiń basqa da birneshe óńirinde tirkelgen bolatyn. Qutqarýshylar men ekologter azamattardy ormanǵa barýdan bas tartýǵa jáne tabıǵat aıasynda qaýipsizdik sharalaryn qatań saqtaýǵa shaqyrady.

Buǵan deıin Almaty oblysynda demalys kúnderi 42 gektar qurǵaq shóp órtengeni belgili boldy.