Katonqaraǵaı men Zaısanda salynatyn áýejaılarǵa kardlar qaıda daıyndalady

ÓSKEMEN. KAZINFORM – Shyǵys Qazaqstan oblysynda Prezıdent tapsyrmasymen qurylysy bastalǵan Katonqaraǵaı men Zaısandaǵy áýejaılar úshin avıatsııa salasy boıynsha mamandar daıarlanbaq.   

Katonqaraǵaı aýdanyndaǵy áýejaı Belqaraǵaı men Órnek aýyldarynyń arasynda, «Óskemen-Rahman qaınary» jolynyń mańynda salynady. Katonqaraǵaı aýylynan 25 km, Úlken Naryn aýylynan 62 km qashyqtyqta ornalasady.

Al, Zaısan aýdanyndaǵy áýejaı burynǵy Satbaı áskerı aerodromynyń ornynda, «Omby-Maıqapshaǵaı» tasjolyna jaqyn jerde boı kóteredi. Bul – Zaısan qalasynan 25 km, Aqjar aýylynan 85 km qashyqtyqtaǵy jer.

QR Kólik mınıstrliginiń málimetinshe, kelesi týrıstik maýsymǵa deıin Zaısan jáne Katonqaraǵaı aýdandaryndaǵy áýejaılar alǵashqy reısterdi qabyldaýǵa daıyn bolýy tıis. 

Qurylystyń bastapqy kezeńinde áýejaılarda uzyndyǵy 2200 metr, eni 45 metr ushý-qoný jolaqtary salynady. Bul Q400, ATR 42/72, CRJ200 ushaqtaryn qabyldaýǵa múmkindik beredi. Osylaısha, Shyǵys Qazaqstanda Katonqaraǵaı, Zaısan, Tarbaǵataı aýdandary men Úlken Naryn aımaǵy áýe qatynasymen qamtylady. Astana, Almaty, Óskemen jáne Semeıge ishki reıster, Qytaı men Reseıge halyqaralyq baǵyttar ashý josparlanyp otyr. 

– Saratovka kolledjinde kelesi oqý jylynan bastap avıatsııa salasy boıynsha mamandardy daıarlaý bastalady. Olar tájirıbeden Shyǵys Qazaqstandaǵy tikushaq otrıady bazasynda ótedi. Bizdiń mindetimiz – jańa áýejaılardy joǵary bilikti kadrlarmen qamtamasyz etý, - dedi ShQO ákimi Nurymbet Saqtaǵanov. 

Eske salsaq, buǵan deıin Zaısan áýejaıynda negizgi qurylys jumystary bastalǵany habarlanǵan.