Katonqaraǵaı men Marqakól arasyn jalǵaıtyn avstrııalyq joldaǵy kópir jóndeledi

ÓSKEMEN. KAZINFORM — Shyǵys Qazaqstan oblysyndaǵy áıgili eski avstrııalyq joldyń bir bóligin qalpyna keltirý jumystary bastaldy.

Uzyndyǵy shamamen 50 shaqyrym bolatyn bul jol Katonqaraǵaı men Marqakól aýdandarynyń arasyn jalǵaıdy. Ol «Katonqaraǵaı» ulttyq tabıǵı parki men «Marqakól» memlekettik tabıǵı qoryǵynyń aýmaǵy arqyly ótedi. Taý bókterindegi jolmen júrgender tabıǵattyń tamashasyna kýá bolady. Munda týrısterdiń jıi keletini de sondyqtan. Ári joldy Birinshi dúnıejúzilik soǵysta tutqynǵa alynǵan avstrııalyqtar salǵandyqtan onyń tarıhy da qyzyq. 
ShQO Jolaýshy kóligi jáne avtomobıl joldary basqarmasynyń málimetinshe, jol tósemesine keshendi zertteý júrgizilip, soǵan sáıkes bastapqy kezekte atqarylatyn jumystar tizimi jasalǵan. Atap aıtqanda, Katonqaraǵaı jaǵyndaǵy apatty jaǵdaıdaǵy kópirdi qalpyna keltirý jáne sý ótkizý qubyrlaryn aýystyrý josparlanǵan.

— Eski avstrııalyq jolǵa qyzyǵýshylyq tanytatyn týrıster qatary artyp keledi. Sondyqtan eń aldymen onyń qaýipsizdigin qamtamasyz etýimiz kerek. Bul maqsatta orman qory jerlerin 25 jylǵa jalǵa alý shartyna qol qoıyldy. Bul bizge joldy júıeli túrde kútip-ustaýǵa múmkindik beredi, — dedi basqarma basshysynyń orynbasary Nurbek Turarov.

Josparlanǵan jumystardyń jalpy quny — 537 mln teńge. Aqsha oblystyq mańyzy bar joldardy kútip-ustaýǵa arnalǵan qarajat esebinen bólinedi. Qurylys tehnıkalary men jumysshylar jolǵa kelesi aptada keledi.

Eske salsaq, osyǵan deıin Óskemen qalasynda Ertis kópiri astyndaǵy jol bıyl paıdalanýǵa beriletindigi jaıly jazǵanbyz.