Katonqaraǵaı aýdanynyń turǵyny Astanadan páter utyp aldy
ASTANA. QazAqparat - Katonqaraǵaı aýdany, Úlken Naryn aýylynyń turǵyny Merýert Kármenova Astanadan páter utyp aldy, dep habarlaıdy «QazAqparat» HAA.
«Astanadan páter utyp aldyńyz» degen súıinshini ol aldymen telefon arqyly estigen. Artynan telefonyna Almatyda tikeleı efırde ótip jatqan utys taratý saltanatynyń vıdeosy da keledi.
«Basynda árıne sengen joqpyn, «siz Astanadan páter utyp aldyńyz» dep telefon shalǵan kezde qazirgi kezde kóp aıtylyp júrgen alaıaqtyq áreketterdiń biri shyǵar dep oıladym. Artynan birden vıdeo keldi, ol jerde meniń esimim atalyp, telefon nómerim kórsetilip jatty», - deıdi Merýert Kármenova.
Kármenovtar otbasynyń kenjesi Ersin jýyqta ǵana halyqaralyq kórkem sóz oqý sheberleri saıysynyń júldegeri atanypty. Úıdiń úlkeni Aqjol jasy tolyp, qolyna jeke kýáligin alǵan. Osyǵan baılanysty analary eki ulǵa da uıaly telefon syıǵa tartpaq bolǵan.
«1 jeltoqsan kúni uldaryma ýáde etken syılyqtaryn satyp alyp berý úshin Zyrıan qalasyna bardym. Turmystyq tehnıka satatyn tanymal dúkenderdiń birindegi satýshy, taýardy jeńildik arqyly nesıege alýǵa keńes berdi. Úsh páterdiń utysqa qoıylǵanyn «2018 syılyq jáne Astanadan úsh páter» atty aktsııa júrip jatqanyn da sol jerde aıtty. Dál sol sátte aktsııaǵa onsha mán bermegenimdi de jasyrmaımyn. Qajetti anketany toltyryp, taýarymdy alyp, oıymda túk joq aýylyma qaıtyp ketip edim, - deıdi utys ıesi.
17 jeltoqsanda Astanadan páter utyp alǵandaryn bilgen Kármenovtar otbasyna, turmystyq tehnıka satatyn fırmanyń ókilderi 21 jeltoqsan kúni kelip arnaıy sertıfıkatty tapsyryp ketipti. Merýerttiń aıtýynsha, aktsııa jeńimpazynyń mindetti salyq tólemderi jaýapkershiligin kompanııa basshylyǵy óz moıyndaryna alǵan.
Qazir Merýert Kármenova Astanadaǵy páteriniń qujattaryn retteý úshin jolǵa daıyndalyp jatyr.
