Katonqaraǵaı aýdanynda áýejaı salynady
ÓSKEMEN. QazAqparat - Shyǵys Qazaqstan oblysynyń Katonqaraǵaı aýdanynda áýejaı salynýy múmkin, dep habarlaıdy QazAqparat tilshisi.
Aýdan ortalyǵy sanalatyn Úlken Naryn aýylynda áýejaı buryn da jumys istegen. Toqsanynshy jyldary jekemenshikke ótken nysannyń ınfraqurylymy tolyqtaı tonalǵan. Al ıesi onyń orny men qańqasy úshin qomaqty qarajat surap otyr. Aýdandyq ákimdik pen kásipkerdiń ymyraǵa kele almaýy saldarynan, Katonqaraǵaı aýdanyna áýe arqyly tikeleı týrıst tartý múmkin bolmaı kelgen. Bul máseleni oblys ákimdigi qolǵa alyp, jańa nysan salý arqyly sheshpek.
«O basta eski áýejaıdy qaıta jaraqtaý kózdelgen. Qazirgi ıesimen kelisimge kele almadyq. Sondyqtan, eski nysannyń janynan jańa áýejaı salý kerek dep sheshtik. Óıtkeni, ol oryn seısmıkalyq jáne geodezııalyq turǵydan áýejaıǵa óte qolaıly ári qaýipsiz. Aýdandyq ákimdik áýejaı ǵımaratyn salady. Al qıyrshyq asfaltsiz ushyp-qoný jolaǵyn oblystyq bıýdjet arqyly tóseımiz. Osylaısha, Katonqaraǵaıǵa keletin týrıster shaǵyn ushaqtar arqyly Almaty men Astana sııaqty qalalardan Óskemenge qonbastan, tikeleı qatynaıtyn bolady», - deıdi oblystyq Jolaýshy kóligi jáne avtomobıl joldary basqarmasynyń basshysy Nurjan Jumadilov.
Ázirge áýejaı qandaı kólemdegi ushaqtarǵa arnalatyny, jobanyń qansha qarjy talap etetini belgisiz. Jobalaý jumystary bıyl aıaqtalsa, qurylys jumystary 2020-2021 jyldary júredi dep kútilýde.
