Katonqaraǵaı aýdanynda 200-den astam usaq maldan kúl aýrýy tabyldy

ÓSKEMEN. QazAqparat – Shyǵys Qazaqstan oblysyndaǵy Katonqaraǵaı aýdanynda 200-den astam usaq malda kúl aýrýy anyqtaldy, dep habarlaıdy QazAqparat tilshisi.

Oblystyq aýyl sharýashylyǵy basqarmasynyń málimetine súıensek, Katonqaraǵaı aýdanynyń Shyńǵystaı, Jańa Úlgi aýyldarynda qoıdaǵy kúl aýrýy alǵash ret osy jyldyń 17 aqpanynda tirkeldi.

Sodan beri aýrý taraǵan mal sany artqan. Aýdan boıynsha 200-den astam usaq maldan kúl aýrýy anyqtalyp otyr.

«Juqpaly aýrý taralýynyń sharyqtaý shegi ótip ketti. Mal qyrylýy bolǵan joq. Veterınarlar sol jerlerde jumys istep jatyr. Emdeýde antıbıotıkalyq terapııa qoldanylýda», - delingen aqparatta.

Vedomstvo dereginshe, osyǵan deıin oblysta usaq malda kúl aýrýynyń órshýi 2000 jyldardyń basynda tirkelgen.

Eske salsaq, osyǵan deıin usaq maldan anyqtalǵan kúl aýrýyna baılanysty ShQO-daǵy eki aýylda karantın jarııalanǵany habarlanǵan.