Katonqaraǵaı aýdanynyń halqy mal soıatyn qasaphana tappaı, qınalyp otyr

ÓSKEMEN. KAZINFORM – Shyǵys Qazaqstan oblysyndaǵy Katonqaraǵaı aýdanynyń halqy aýyldarda qasaphana joqtyǵynan mal soıa almaı otyrǵandyqtaryna shaǵymdandy. Jumys istep turǵan jar degende jalǵyz qasaphana aýdan ortalyǵynda ornalasqan. Al oǵan baryp otyrý - qaltaǵa qosymsha salmaq.

«Alyp-satarlarǵa arzanǵa berýge májbúrmiz»

Katonqaraǵaı aýdanynda halyqtyń negizgi eki tabys kózi bar. Onyń biri – mal sharýashylyǵy, ekinshisi – týrızm. Altaıdyń alty aıǵa sozylatyn qysynda týrızmnen paıda túspeıdi. Sol úshin eldiń kóbi Qazaqstannyń barlyq aýyldaryndaǵy sııaqty tórt-túliktiń súmesin nápaqa etedi. Alaıda jurt eldi mekenderde qasaphananyń joqtyǵy qıyndyqtyń qamytyn kıgizip turǵanyn aıtýda. 

- Bizde aýdan boıynsha jalǵyz qasaphana bar. Ol Katonqaraǵaı aýylynda ornalasqan. Mysaly, bir jylqyny soıý úshin kólik jaldap, ony sol jaqqa tasýǵa týra keledi. Odan soń soıyp bergen qasapshy men anyqtama jazǵan mal dárigerine aqsha tóleımiz. Sonda bir jylqynyń etin satamyn dep qanshama ábigerge túsemiz, - deıdi turǵyndar.

Aýdan ortalyǵyna jaqyn aýyldarǵa sál jeńildeý. Alaıda Berel sııaqty 80 shaqyrym jerdegi aýyldardyń halqyna bul qosymsha shyǵyn. 

- Osynyń saldarynan malymyzdy alyp-satarlarǵa arzanǵa bere salamyz. Olar ózderi maldyń bárin jıyp, soıdyrýǵa aparady. Solarǵa tıimdi. Al biz sııaqty qarapaıym malshylar myna qymbatshylyq qysyp bara jatqan ýaqytta paıda kóre almaı otyrmyz, - dep narazylyqtaryn bildirdi katonqaraǵaılyqtar.

Ákimdik ne deıdi?

Talaıdy tolǵantqan túıtkildi máselege qatysty aýdan ákimdiginiń jaýabyn bilý úshin resmı saýalhat joldadyq.

- Aýyl sharýashylyǵy mınıstriniń 2015 jylǵy 27 sáýirdegi №7-1/370 buıryǵyna sáıkes, eti saýdalanatyn kez kelgen mal arnaıy qasaphanalarda soıylýy shart. Alaıda mal soıý nysandaryn memleket tarapynan salý, qarjylandyrý, kútip-ustaý qarastyrylmaǵan. Qyzmettiń bul túri veterınarııalyq kásipkerlik bolyp sanalady. ıAǵnı, mundaı alańdardy jeke kásipkerler nemese aýyl adamdary birlese otyryp, óz qarajattaryna salýy kerek, - dep jaýap berdi Katonqaraǵaı aýdany ákiminiń mindetin atqarýshy Rasýl Karabalınov. 

Onyń aıtýynsha, Katonqaraǵaı aýylyndaǵy qasaphana 2008 jyly ashylǵan. Jer kólemi 1 gektardy quraıdy. 

- Ǵımarat ishiniń kólemi - 150 sharshy metr. Aýlasynda 50 basqa arnalǵan qorasy bar. 60 tonna et saqtaıtyn tońazytqyshpen jabdyqtalǵan. Kúnine 25-30 bas maldy qabyldaıdy. ıAǵnı, 5 tonnaǵa deıin et soıýǵa bolady. Qasaphana ıesi - jeke kásipker Gaýhar Taýkenova, - deıdi Rasýl Karabalınov.

Demek, bul máselede aýyl halqy ákimdikten úmit kútpeı, ózderi amaldaýlary tıis. Qaltasy qalyń jeke kásipkerlerge qolqa salyp nemese «kóp túkirse - kól» degendeı, ózderi jıystyryp qasaphanalar salýlary qajet. 

Eske salsaq, buǵan deıin Aýyl sharýashylǵy mınıstri Aıdarbek Saparov mal sharýashylyǵyn damytýǵa kooperatıvter arqyly berilip kelgen sýbsıdııalar toqtaıtynyn aıtqan.