Katonqaraǵaı aýdanynda jumys ýaqyty bir saǵatqa keri shegerildi

ÓSKEMEN. KAZINFORM — Shyǵys Qazaqstan oblysyndaǵy Katonqaraǵaı aýdanynda jumys ýaqyty bir saǵatqa keri shegerildi.

Katonqaraǵaı aýdanynda memlekettik jáne áleýmettik mekemelerde pılottyq rejımde jańa jumys kestesi engizildi. 

Endi aýdandaǵy 40 mekeme aptasyna bes kún saǵat 08:00–den 17:30–ǵa deıin jumys isteıdi. Túski úzilis 12:00–den 13:30–ǵa deıin. Mundaı jumys rejımine kóshý týraly sheshim turǵyndarmen bolǵan talqylaýlardan keıin qabyldanyp otyr. 

Jeltoqsan aıynda aýdanǵa bir top oblystyq basqarmalar basshylary kelip, sonyń ishinde Órel, Arshaty, Berel, Jambyl jáne taǵy basqa jıyny 18 eldi mekende kezdesýler ótkizdi. Sol kezdesýler barysynda jumys kúniniń bastalýyn tańǵy saǵat 08:00–ge aýystyrý jaıy sóz etildi. 

— Jańa jumys ýaqyty klımattyq jaǵdaılar men jergilikti turǵyndardyń ómir yrǵaǵyn eskere otyryp, ónimdiliktiń artýy men óńirdiń damýyna yqpal etedi. Sondyqtan turǵyndardyń pikirleri eskerildi, — dep habarlady aýdandyq ishki saıasat bóliminen.

Katonqaraǵaılyqtar da bul jumys kestesiniń ózderine qolaıly ekenin aıtyp jatyr.

Eske salsaq, buǵan deıin Katonqaraǵaı aýdanynyń halqy mal soıatyn qasaphana tappaı, qınalyp otyrǵany jaıly jazǵanbyz.