Katon-Qaraǵaı ulttyq parkinde qar barysy fototuzaqqa tústi

ASTANA. KAZINFORM — Katon-Qaraǵaı ulttyq tabıǵı parkiniń Arshaty ormanshylyǵynda qar barysy fototuzaqqa tústi, dep habarlaıdy Ekologııa jáne tabıǵı resýrstar mınıstrligi.

Fototuzaqty ormanshy Jomart Amanbaev ornatqan. Nátıjesinde Qazaqstan Respýblıkasynyń Qyzyl kitabyna engizilgen qar barysy (Panthera uncia) beınelengen biregeı kadrlar alyndy.

— Bul derek tabıǵatty qorǵaý baǵytynda qabyldanyp jatqan sharalardyń tıimdiligin kórsetetin mańyzdy dálel sanalady. Jabaıy janýarlardy baqylaý jumystary jalǵasady. Qar barysyn birge saqtaıyq! — delingen mınıstrlik habarlamasynda.

Buǵan deıin Altaıdyń Búrkitaýy aýmaǵyndaǵy fototuzaqqa Qyzyl kitapqa engen, sırek kezdesetin ańdardyń biri — qar barysy túsip qalǵanyn jazdyq.