KATEV qory mektepter arasynda «Jarqyn bolashaq» atty V respýblıkalyq qazaq tili olımpıadasyn ótkizedi
«QR Memlekettik tili - qazaq tili - uly dalany meken etken baıyrǵy qazaq halqy men qazaqstandyq basqa da ult ókilderiniń tarıhı taǵdyryn toǵystyrǵan, teńdik pen tatýlyqty ustana otyryp, beıbit qoǵamdy qalyptastyrýǵa qol jetkizip otyrǵan birden-bir uly rámizi. Elbasy N.Á.Nazarbaev: «Bizdiń, búkil qazaqstandyqtardyń basyn biriktiretin basty faktor - memlekettik til. Qazaq halqynyń týǵan tilin damytý úshin barlyq kúsh-jigerimizdi jumsaýymyz kerek», - dep, memlekettik til máselesine erekshe nazar aýdaryp keledi. Osyǵan oraı, KATEV Halyqaralyq qoǵamdyq qorynyń uıymdastyrýymen jalpy orta bilim beretin mektepterdiń qazaq tobynda jáne ózge ult toptarynda oqıtyn 7-11-synyp oqýshylary arasynda «Jarqyn bolashaq» V respýblıkalyq «KATEV» qazaq tili olımpıadasy ótkiziledi», delingen baspasóz habarlamasynda.
Sharanyń maqsaty - memlekettik tildiń qoldanylý aıasyn keńeıtý jáne ony damytý, ári qazaq tili men ádebıeti pánderi boıynsha erekshe daryndy oqýshylardy anyqtaý jáne olarǵa qoldaý kórsetý. Sondaı-aq olımpıadany ótkizýdiń basty maqsattarynyń biri - qazaqsha sóıleýmen qatar, qazaq tilinde án aıtý, mánerlep oqý, ǵylymı jumys qorǵaý, shyǵarmashylyq qabiletin kórsetý, qazaq tili men qazaq ádebıetin jaqsy meńgerý arqyly Qazaqstannyń «jarqyn bolashaǵy» úshin aıanbaı qyzmet etetinin kórsetken naǵyz «segiz qyrly, bir syrly» jastarǵa erekshe qoldaý kórsetý bolyp tabylady.
Olımpıadada oqýshylardyń qazaq halqynyń tili, ádebıeti, salt-dástúri, tarıhy, mádenıeti sekildi ulttyq qundylyqtarǵa degen qyzyǵýshylyǵyn arttyrý, tulǵanyń óz-ózin damytýyna jáne qabiletin ushtaýǵa yqpal etý mindetteledi.
Bıyl besinshi ret ótkizilip otyrǵan «Jarqyn bolashaq» olımpıadasynyń aqtyq básekesi (fınal) sáýirdiń 5-6 aralyǵynda Astana qalasynda ótedi. Jalpy «Jarqyn bolashaq» olımpıadasy úsh kezeńnen turady:
1 kezeń - aýdandyq kezeń (jeltoqsan-qańtar aılarynda ótedi);
2 kezeń - oblystyq kezeń (aqpan-naýryz aılarynda ótedi);
3 kezeń - respýblıkalyq kezeń (fınal).
Budan bólek, olımpıada aıasynda 5 konkýrs bar: «Tilshi ádebıetshiler», «Ánshi-bulbuldar», «Jas ǵalymdar», «Sóz sheberleri», «Jazýshylar».
Árbir baǵyt boıynsha Olımpıadanyń jeńimpazdary men júldegerleri anyqtalady. Olar «KATEV» Halyqaralyq qoǵamdyq qorynyń І, ІІ, ІІІ dárejeli dıplomdarymen jáne baǵaly syılyqtarmen marapattalady. Sondaı-aq olımpıadanyń eń joǵary nátıje kórsetken 11-synyp oqýshylaryna Súleıman Demırel ýnıversıtetiniń granty tabys etiledi. Baǵyttar boıynsha oryn alǵan oqýshylardyń muǵalimderi gramotalarmen marapattalady.
