«KATEV» qory «Bolashaqqa bastaǵan jarqyn 20 jyl» atty merekelik shara uıymdastyrmaq
ASTANA. 10 maýsym. QazAqparat - Bıyl Qazaqstannyń bilim men mádenıet salasynda qyzmet kórsetý arqyly qazaq-túrik arasyndaǵy dostyq pen tatýlastyqtyń altyn kópiri bolyp otyrǵan «KATEV» Halyqaralyq qoǵamdyq qoryna 20 jyl tolyp otyr. Osyǵan oraı, «KATEV» Halyqaralyq qoǵamdyq qory keń kólemde «Bolashaqqa bastaǵan jarqyn 20 jyl» atty merekelik is-shara ótkizedi. Bul týraly qordyń baspasóz qyzmetinen habarlandy.
Merekelik saltanatqa Qazaqstan Respýblıkasy Bilim jáne ǵylym mınıstri Baqytjan Jumaǵulov, Túrkııa Respýblıkasynyń Parlament tóraǵasynyń orynbasary Mehmet Saglam, Túrkııa Respýblıkasynyń Tótenshe jáne ókiletti elshisi Omer Týzel, Túrkııa elindegi «Fatıh» ýnıversıtetiniń rektory, professor Sherıf Alı Tekalan, «KATEV» Halyqaralyq qoǵamdyq qory prezıdenti Mehmet Mesýt Ata, Súleıman Demırel ýnıversıtetiniń rektory, professor Mesýt Akgúl, QR Prezıdenti ákimshiliginiń ókilderi, Parlament Senatynyń depýtattary, Respýblıkalyq bilim ortalyqtarynyń jetekshileri jáne BAQ ókilderi qatysady. Shara aıasynda jastarǵa sapaly bilim men tálimdi tárbıe berip, Qazaqstannyń oqý-aǵartý salasynyń damýyna úlken úles qosyp kele jatqan qazaq-túrik lıtseıleriniń ustazdary arnaıy marapattalatyn bolady.
«Qazaqstan men Túrkııa elderi arasyndaǵy qarym-qatynas təýelsizdiktiń alǵashqy jyldary qarqyndy damyp, elaralyq kelisim negizinde «KATEV» Halyqaralyq qoǵamdyq qory quryldy. Elimizdiń bilim salasynyń damýyna yqpal etip, daryndy jastardy daıyndaýǵa, olardyń jarqyn bolashaǵyn qalyptastyrýǵa jol ashatyn qazaq-túrik lıtseıleri ashyldy. Qazirgi tańda Qazaqstanda jalpy sany, 29 qazaq-túrik lıtseıleri, sondaı-aq, elimizdiń bas qalasy - Astanada jáne Óskemen qalasynda «Nur Orda» halyqaralyq bilim kesheni, Almaty jáne Taraz qalasyndaǵy kolledjder, Almatydaǵy Súleıman Demırel atyndaǵy ýnıversıtet bar» delingen baspasóz habarlamasynda.
