Qaterli janartaý bulty Máskeýge jetti
ASTANA. Sáýirdiń 16-sy. QazAqparat - Budan buryn habarlaǵanymyzdaı, búkil Eýropanyń aspanyn qaýipti janartaý bultymen tumshalaǵan qater kórshiles Reseı astanasy Máskeýdi de úreılendirip otyr,
deıdi QazAqparat mail.ru saıtyna silteme jasap.
Janartaýdan atqylaǵan kúldi bult Islandııanyń janartaýy belsendiliginen keıin paıda bolǵan, jelmen kóshken bulttar reseılik astana aýmaǵyna da jetipti. «Máskeý osy bulttardyń shashyrap jaıylǵan bólshekteriniń jartylaı qorshaýynda qalǵandaı», dep habarlaıdy Reseıgıdromet meteorologııalyq agenttiginiń bas dırektory Marına Petrova.
«Biz aqparatty jedel Reseıavıatsııa men Reseıaeronavıgatsııaǵa jetkizdik, endi ondaǵylar qazir Reseıdiń áýe keńistigin paıdalaný máselesin sheshý ústinde, - deıdi ITAR-TASS Petrovanyń sózin keltire otyryp. - Ushý múmkindigi shuǵyl túrde árbir naqty reıske qatysty sheshiledi, onyń ishinde ushaqtardyń ártúrli tehnıkalyq erekshelikteri de eskerilmek».
Bul bulttar adam kózine baıqalmaıdy, biraq janartaý kúl-qoqysy ushaq qozǵaltqyshyn tunshyqtyrýy múmkin.
Islandııadaǵy janartaýdyń atqylaýynan soltústik-batys Eýropanyń aspan keńistigi eki kún boıyna jabylady. Osynyń saldarynan «Aeroflot» shuǵyl shtab quryp, Eýropa elderine, sondaı-aq Kalınıngradqa ushatyn reısterge ruqsat bermegen.
Islandııanyń aýqymy turǵysynan besinshi muzdaǵy - Eııafıadlaekýdl janartaýynyń atqylaýy naýryzdyń 21-inde bastalǵan-dy. Sáýirdiń 1-inde janartaýdyń taǵy bir krateri jarylǵan. Sonyń kesirinen bildeı bir qurlyqtyń áýe keńistiginde - naǵyz kollaps. Aldymen Eski qurlyqtyń asa iri úsh áýejaıynyń biri - londondyq Hıtroý jabyldy. Ondaǵan reıster keıinge shegerilgen. Irlandııa, Norvegııa, Shvetsııa, Danııa, Fınlıandııa men Latvııa ushaqtardy múlde qabyldaýdy qoıdy. Frantsııada birden 24 áýejaı jabylǵan, onyń ishinde Parıj de bar.
