Qaterli isiktiń erte dıagnostıkasy uzaq ómir súrýge múmkindik beredi – onkolog
ALMATY. QazAqparat – «Qazaq onkologııa jáne radıologııa ǵylymı-zertteý ınstıtýty» AQ basqarma tóraıymynyń klınıkalyq jumys jónindegi orynbasary Nurlan Baltabekov «Ókpe qaterli isigi. Ozyq sheshimder» taqyrybynda ótip jatqan onlaın halyqaralyq konferentsııada qaterli isikti erte anyqtap, emdeýdiń mańyzdylyǵy týraly aıtty, dep habarlaıdy QazAqparat tilshisi.
Nurlan Baltabekov Qazaqstanda ókpeniń qaterli isigi sońǵy 25 jyl ishinde qaterli isik óliminiń qurylymynda birinshi orynda turǵanyn atap ótti. Eldegi árbir besinshi onkologııalyq naýqas ókpeniń qaterli isiginen qaıtys bolady.
« Qaterli isiktiń asqynǵan túri men erte anyqtalǵan túrin emdeý - bul eki túrli baǵyt. Sonymen, ókpeniń qaterli isiginiń birinshi kezeńi ýaqtyly hırýrgııalyq emdeýmen, ásirese lımfa túıinderin torakoskopııalyq jolmen alyp tastaý patsıentterdiń 90% -dan astamyn bes jyldan astam ómir súrýge múmkindik beredi»,- Nurlan Baltabekov aıtty.
Ol ókpeniń qaterli isiginiń keıbir túrlerin, mysaly, adenokartsınomamen aýyratyn naýqastardy onkologtardyń kómegimen jáne jańa tehnologııalardy engize otyryp aman alyp qalýǵa bolady.
«Buryn bizde tórtinshi satydaǵy ókpeniń qaterli isigi bar naýqastar bes jyl ómir súre alamaıtyn. Maqsatty emdeýdiń jańa tehnologııalaryn engizý keıbir patsıentterge, shamamen 1/4, tórtinshi kezeńde de uzaq ómir súrýge múmkindik berdi. Biraq osyndaı bir naýqasty emdeý úshin jylyna 40 mln teńge jumsalady.Sondyqtan ókpeniń qaterli isigin erte dıagnostıka arqyly anyqtaý qajet.Tek sol kezde ǵana metastazdardyń paıda bolýyna jol berilmeıdi «, - dedi ol.
Qaterli isikti baqylaý jónindegi halyqaralyq agenttiktiń ókili doktor Andrea Karvalo tómen dozaly kompıýterlik tomografııa kómegimen ókpe qaterli isigine skrınıng ótkizýdiń tıimdiligi týraly aıtty.
«Qazirgi tańda ókpe ragynan bolatyn ólimdi azaıtýdyń birden-bir joly ony erte kezeńde anyqtaý bolyp otyr. Skrınıng júrgizilgende qatysýshylardyń 50-70%-de isiktiń І satysy anyqtalady. Sondyqtan osyndaı skrınıngti tekseristerdi keshendi túrde ótkizý qajet. Ol úshin tómen dozaly kompıýterlik tomografııa qoldanylady. Máselen, 2020 jyly osyndaı skrınıngtiń arqasynda ókpe ragynyń І satysynda – 58,6%, ІІ satysynda – 9,3%, ІІІ satysynda – 9,9%, ІV satysynda – 9,4%-y anyqtalǵan. Kórip otyrǵandaryńyzdaı raktyń 70 paıyzdaıy І jáne ІІ satysynda anyqtalǵan, bul emdeýge jatatyn kezeń», - deıdi sarapshy.
Aıta keteıik, Almatyda «Qazaq onkologııa jáne radıologııa ǵylymı-zertteý ınstıtýty» AQ, «Qazaqstandyq onkologtar qaýymdastyǵy» QB-nyń uıymdastyrýymen ótip jatqan konferentsııaǵa Italııa, Túrkııa, Ispanııa, Reseı, Belorýssııa jáne Qazaqstannyń onkologııalyq ortalyqtardyń sarapshylary qatysyp jatyr.
