Qaterli isikti jeńip, fýtbolǵa oraldym – «Super Bol» komandasynyń jalǵyz gol salýshysy suhbat berdi
Ádilet Qojataev 2003 jyly Taldyqorǵanda dúnıege kelgen, Almaty qalasynda týyp-ósken. Ol 17 jasynda qaterli isikke shaldyǵyp, aýrýdy eńserip, fýtbolǵa qaıta oralǵan jigerli jan.
«Fýtbolmen bala kezden shuǵyldandym. Es bilgeli úlken fýtbolǵa, Lıonel Messı sekildi álemdik deńgeıdegi sportshylarǵa qyzyǵyp óstim. Osylaısha, 5-synypta «Qaırat» fýtbol klýbyna jazyldym. Arasynda jalqaýlyǵymnan úzilis alǵan kezder de boldy. Biraq 9-synypta aldaǵy ómirimdi tek fýtbolmen baılanystyramyn degen nyq senim boldy. Biraq, 2020 jyly 17 jasymda qaterli isik tabyldy. Sonda úmitim úzilgen edi», - deıdi Á. Qojataev agenttik tilshisine bergen suhbatynda.
Qajetti em alǵan soń, Ádilet eki jyl buryn fýtbolǵa qaıta oralǵan.
«Sebebi fýtbol men úshin jaı sport emes, tutas ómirim ispettes. Qazir kezeń-kezeńimen dárigerge tekserilip otyramyn, densaýlyǵym jaqsy. Dostarym meniń fýtbolǵa qyzyǵatynymdy jaqsy biledi, «Super bol» týraly habarlamany birden jiberdi. Bul joba maǵan úlken úmit berdi. Bapkerimiz Evgenıı ıArovenkodan kóp nárse úırendik, ol fýtbol áleminde ákemizdeı bolyp ketti. Elimizdiń barlyq qalasynan jınalǵan komanda jańa baýyrlaryma aınaldy», - deıdi sportshy.
Ádilet Qojataev oıynnyń 88-mınýtynda gol salyp, qarymta qaıyra aldy. Oıyn esebi 1:4 boldy.
«Shynymdy aıtsam, gol salý men úshin mańyzdy bolmady. Sebebi komandamyz utylyp jatqan edi. Al men eń alǵashqy maqsatym - bapkerimniń úmitin aqtap, jeńiske jetý boldy. Degenmen búgingi oıynǵa jan dosym men súıikti qyzym tosynsyı jasap, Astanaǵa kelip, maǵan jankúıer boldy. Olardyń qoldaýy erekshe mańyzdy boldy. Aldaǵy ýaqytta da fýtbolmen shuǵyldanǵym keledi. Armanym - «Qaırat» klýbynda oınaý», - deıdi Ádilet Qojataev.
Aıta keteıik, «Super Bol» - 16-23 jas aralyǵyndaǵy jigitter arasynda talanttardy izdeýge baǵyttalǵan áleýmettik-sporttyq realıtı-shoý. Jobanyń basty maqsaty - áýesqoı fýtbolshylarǵa óz armandaryn júzege asyrýǵa jáne kásibı kelisimshartqa qol qoıýǵa kómektesý.
4-30 mamyr aralyǵynda joba skaýttary men jattyqtyrýshylary kastıng ótkizip, Qazaqstannyń 14 qalasyn aralady. Olarǵa 16000-nan astam úmitker qatysyp, úzdikteri fınaldyq kastıngke shaqyryldy.
Bul oıynǵa sheteldik jetekshi klýbtardyń 20-ǵa jýyq skaýty keldi. Demek, «Super Bol» oıynshylary ózderin kórsetip, sheteldik fýtbol klýbtaryna joldama ala alady. Búgingi matchtyń basty maqsaty da osy.
Sondaı-aq jas sportshylardy qoldaýǵa QR Mádenıet jáne sport mınıstri Ashat Oralov, tanymal boksshy Serik Sápıev, Freedom Holding korporatsııasynyń tóraǵasy Tımýr Týrlov keldi.
