Qaterli isikti jeńgen 19 jasar fýtbolshy Astananyń eń úzdik otbasyna aınaldy
ASTANA. QazAqparat - Oqýshylar saraıynda «Úzdik jas otbasy» baıqaýynyń saltanatty sońǵy kezeńi ótti, dep habarlaıdy QazAqparat elorda ákimdiginiń resmı saıtyna silteme jasaı otyryp.
70 ótinimniń ishinen iriktelip alynǵan Astananyń úzdik 10 otbasy Oqýshylar saraıynyń sahnasynda óz ónerlerin kórsetip, kórermender men qazylar alqasyna otbasylyq uıymshyldyǵyn, mahabbat, dostyq jáne ózara túsinistikterin dáleldedi.
Sheshýshi kezeńniń qorytyndysy boıynsha Azat pen Álııa Jumaǵulovtar úzdik jas otbasy dep tanyldy. 2-oryndy Ergen men Gaýhar Kenjeǵulovtar ıelense, i 3-oryn Bahtııar men Shadııar Muhametqalıevterge buıyrdy.
«Meniń oıymsha, osy tektes sharalar otbasynyń uıymshyldyǵyn arttyrady. Biz úshin kútpegen jeńis boldy. Shynymdy aıtsam, ótinimdi sońǵy mezette berdik. Óte qýanyshtymyz! Bul saıystan keıin bir-birimizdi burynǵydan jaqsyraq túsinetindeımiz» ,- dep aǵynan jaryldy jeńimpazdar otbasy.
Fınalısterdiń qatarynda - «Astana» FQ burynǵy tárbıelenýshisi Bahtııar Muhambetqalıev, «Ulttyq Ulan» orkestriniń aǵa mýzykanty Aıdos Qodyǵanov, Ulttyq neırohırýrgııa ortalyǵynyń dárigeri Ergen Kenjeǵulov bar.
«Bizdiń basty maqsatymyz - jas otbasylarǵa qandaı jaǵdaı bolmasyn birge bolý jáne bir-birin jaqsy kórý kerek ekenin kórsetý. Sebebi, bizdiń otbasymyzdyń basynan ótken jaǵdaılardy, tipti, dushpanyńa da tilemeısiń» ,- dep bólisti baıqaýǵa qatysýdan alǵan áserimen aıaǵynan aırylyp, qaterli isikti jeńgen 19 jasar fýtbolshy Bahtııar Muhambetqalıev.
«Úzdik jas otbasy» saıysy naǵyz otbasylyq merekege aınaldy.
Saıystyń júlde qory 800 myń teńgeni qurady, atalmysh soma sońǵy kezeńge ótken qatysýshylarǵa úlestirildi: 1-oryn ıegerlerine - 200 myń teńge, 2-oryn - 150 myń teńge, 3-orynǵa - 100 myń teńge jáne júldeli oryn almaǵan otbasylarǵa 50 myńnan yntalandyrý syılyqtary.
