Qaterli isikpen kúresýge 2 mln. dollar bólgen A.Myrzabaev ǵylymdy qarjylandyrýdy maqsat etýde
ASTANA. QazAqparat - Qaterli isik aýrýlarymen kúresý maqsatyndaǵy zertteýlerge 2 mln. AQSh dollaryn bólgen 25 jastaǵy qazaqstandyq baǵdarlamashy Ashat Myrzabaev bolashaqta ǵylymdy odan ári qarjylandyrýdy maqsat tutyp otyr. Bul týraly ol búgin Astanada ótken Qazaqstannyń patrıottar forýmynda málim etti.
«Meniń jasym qazir 25-te. AQSh-ta qyzmet etken kezde men jumystan tájirıbe alyp qana qoımaı, bir mańyzdy nárseni uqtym: uly nárseni ómirge ákelý úshin, aýqymdy oılaý kerek, ózińe tereń suraqtar qoıýyń kerek. Ómirdiń máni ne? Qandaı iz qaldyra alamyn? Adamzatqa ne beremin? Ózime ol saýaldardyń jaýabyn taptym. Men ǵylymnyń damýyn qoldaǵym keledi. Sol úshin de men qaterli isik pen onkologııany zertteýge 2 mln. dollar bólýdi sheshken edim», - dedi ol forým barysynda.
Onyń aıtýynsha, aýyr dertke dýshar bolǵandarǵa kómektesý qushtarlyǵy onda stýdenttik kezden bastalǵan.
«Ýnıversıtettiń úshinshi kýrsynda men AQSh-tyń San-Frantsısko qalasyna Tvıtter kompanııasyna tájirıbelik jumysqa ornalasýǵa múmkindik aldym. Onda men keremet jigittermen tanystym, olar maǵan jobany jasaýǵa kómektesti, keıinnen ony Microsoft kompanııasy satyp aldy. Osydan soń men kólemdi aqparatpen jumys jasaýda iri qarjy kompanııalarynyń tájirıbesin aldym», - dedi ol.
