Qaterli isikpen aýyratyndardyń sany jyldan jylǵa ósip keledi - O. Shatkovskaıa
ALMATY. Aqpannyń 4-i. QazAqparat /Názıra Eleýhan/ - Qalalyq onkologııalyq dıspanserde 18 000 patsıent esepte tur. 2009 jyly 3 000 adam esepke alyndy.
Qaterli isikpen aýyratyndardyń sany jyldan jylǵa ósip keledi. Bul týraly búgin Almatyda «Qaterli isikpen kúrestiń dúnıejúzilik kúnine» oraı ótkizilgen arnaıy baspasóz májilisinde qalalyq onkologııalyq dıspanserdiń meńgerýshisi Oksana Shatkovskaıa málim etti, dep habarlaıdy QazAqparat.
Onyń aıtýynsha, sońǵy kezderi emdelýshilerdiń 50 paıyzy aýrýdyń ábden asqynyp ketken kezinde qaralýǵa keledi. «Biz qaterli isiktiń 1-2-shi satysyndaǵy kezinde emdep jaza alamyz. Al, asqynǵan 3-4 satysy kezinde, hırýrgııalyq, hımııalyq jáne taǵy da basqa ádistik em qajet bolady. Onyń ózi kóp qarajatty talap etip qana qoımaı, adam ómirine qaýip tóndiredi. Biz sondyqtan da, turǵyndardy jylyna bir ret profılaktıka úshin qaralyp turýǵa shaqyramyz», dedi Oksana Shatkovskaıa. Onyń aıtýynsha, Úkimet tarapynan bul aýrýdyń aldyn alýǵa az ister atqarylyp jatqan joq. Barlyq medıtsınalyq kómekter tegin usynylady.
Atalmysh kúnge oraı, qalalyq onkologııalyq dıspanserdiń mamandary qalanyń barlyq emhanalarynda «Ashyq esik kúnderin» ótkizip, tegin keńes berýde. Aktsııanyń maqsaty - qaterli isiktiń aldyn alý bolyp tabylady.
«Elbasynyń qoldaýymen qurylǵan qalalyq onkologııalyq dıspanser men «Bárimiz qaterli isikke qarsy» qoǵamdyq qory dárigerleriniń maqsaty - BAQ arqyly adamdardy osy ózekti máselege nazar aýdartý. Tek bul kúni emes, ár kezde bul másele aıtylyp, túsindirme jumystary udaıy júrgizilip turýy kerek dep sanaımyz», dedi Oksana Shatkovskaıa.
