Qaterli isikke shaldyqqandarǵa elimizde qandaı kómekter kórsetiledi
ALMATY. QazAqparat – Qazaqstanda onkologııalyq dertke shaldyqqan naýqastarǵa kómek tegin medıtsınalyq kómektiń kepildik berilgen kólemi aıasynda kórsetiledi. Bul týraly Almaty onkologııalyq ortalyǵy konsýltatıvtik-dıagnostıkalyq bóliminiń meńgerýshisi Náılá Aqjolova aıtty, dep habarlaıdy QazAqparat tilshisi.
Dárigerdiń aıtýynsha, qaterli isikpen aýyratyn naýqastarǵa onkologııalyq kómek birinshi, ekinshi jáne úshinshi deńgeıde kórsetiledi. Sondaı-aq, patsıentterge jeke medıtsınalyq kómek kórsetýdi qamtamasyz etý úshin medıtsınalyq kómektiń barlyq deńgeıinde kópbeıindi toptar qurylady.
«Almatydaǵy 76 emhanada bastapqy deńgeıde onkologııalyq kómek kórsetiledi. Emhana jumysynyń negizgi maqsatynyń biri – qaterli isik aýrýyn erte kezeńde belsendi túrde anyqtaý. Oǵan qol jetkizý úshin halyqtyń maqsatty toptaryna skrınıngtik tekserý júrgiziledi. Búgingi tańda Almatyda maqsatty halyq tobynyń 70 paıyzdan astamy skrınıngtik tekserýmen qamtylǵan», - dedi dáriger.
Eger jalpy tájirıbe dárigeri isik aýrýyna kúdiktense nemese dıagnoz qoıylsa, naýqasty aryqaraı tekserý úshin emhanadaǵy onkologke jiberedi. Eger onkolog qaterli isikke kúdikti rastasa, naýqas Almaty onkologııalyq ortalyǵynyń konsýltatıvtik-dıagnostıkalyq bólimine jiberiledi.
«Almaty onkologııalyq ortalyǵynda onkolog dıagnozdy, onkologııalyq protsestiń taralýyn jáne aýrýdyń satysyn, aýrýdyń qaıtalanýyn anyqtaý úshin qajetti tekserý men dıagnostıkalyq zertteýler júrgizedi. Kórsetkishterge sáıkes, mýltıdıstsıplınarlyq toptyń usynysyn eskere otyryp, patsıent mamandandyrylǵan medıtsınalyq kómek, onyń ishinde joǵary tehnologııalyq medıtsınalyq qyzmetti alý úshin aýrýhanaǵa jatqyzylady nemese oǵan isikke qarsy ambýlatorlyq terapııa kórsetiledi», - deıdi Náılá Aqjolova.
Dıagnoz qoıylǵan sátten bastap onkologııalyq naýqas tirkelgen jeri boıynsha ambýlatorlyq negizde medıtsınalyq kómek kórsetetin uıymda ómir boıy medıtsınalyq dınamıkalyq baqylaýda bolady.
«El, aımaq ishinde turǵylyqty jerin nemese tirkelgen uıymdy aýystyrý kezinde naýqas dınamıkalyq baqylaýdan alynbaıdy, qujattardy bastapqy ne ekinshi deńgeıli medıtsınalyq uıymǵa jibere otyryp, jańa tirkelgen turǵylyqty jeri boıynsha kómek alady», - dep atap ótti dáriger.
