Qaterli isikke qarsy kúres kúni: Elimizdegi mańyzdy nysandar kók túspen jaryqtandyrylady
ALMATY. QazAqparat – Búgin Dúnıejúzilik qaterli isikke qarsy kúres kúni. Osyǵan oraı Nur-Sultan jáne Almaty qalalaryndaǵy mańyzdy nysandar kók túspen jaryqtandyrylady, dep habarlaıdy QazAqparat tilshisi.
«Halyqaralyq onkologııalyq aýrýlarǵa qarsy kúres jónindegi odaq» (UICC) jarııalaǵan. Bul kúnniń maqsaty - obyrdyń qazirgi zamandaǵy eń qaýipti aýrýlardyń biri ekendigi týraly jurtshylyqty habardar etý, osy keseldiń aldyn alýǵa, anyqtaýǵa jáne emdeýge nazar aýdarý.
Búgin Elordada «Báıterek» monýmenti men «Han Shatyr» SOO, Almatyda – «Halyq Arena» sport jáne mádenıet saraıy, «Almaty Arena» muz saraıy, Abaı atyndaǵy Qazaq memlekettik akademııalyq opera jáne balet teatry, Renion Park qonaq úıi men MEGA Alma-Ata SOO-daǵy Happy Eye sholý dóńgelegi kók tústi shamdaryn jaǵady.
Aktsııanyń bastamashylary Qazaq onkologııa jáne radıologııa ǵylymı-zertteý ınstıtýty (QazORǴZI), «Qaterli isikpen kúreseıik» qoǵamdyq qory jáne Takeda bıofarmatsevtıkalyq kompanııasy qoǵamnyń nazaryn osy jahandyq problemaǵa aýdarý jáne halyqty keseldi erte anyqtaýǵa jáne emdelýge shaqyrý, búgingi órkenıettiń eń aýyr dertteriniń biri retinde jurtshylyqtyń qaterli isik týraly habardarlyǵyn arttyrý maqsatynda is-sharany júzege asyrdy.
«Búgingi onkologııa alǵa qaraı qadam basty. Qazirgi tańda 10-15 jyl buryn emdeý múmkin bolmaǵan keselderge em bar. Onkologııalyq aýrýlardy emdeýdegi álemdegi aldyńǵy qatarly ádistemeler ıgerildi jáne olar Qazaqstanda belsendi qoldanylady. Osynyń barlyǵy tegin emdelýge muqtaj árbir azamatqa tegin medıtsınalyq kómektiń kepildik berilgen kólemi sheńberinde qoljetimdi. Alaıda, uzaq ýaqyt emdelýden arylýǵa jáne tipti ómirdi saqtap qalýǵa múmkindik beretin eń mańyzdy faktor – turaqty onkoskrınıng pen aýrýdyń erte kezeńderinde azamattardyń júginýi, - deıdi «Qazaq onkologııa jáne radıologııa ǵylymı-zertteý ınstıtýty» AQ Basqarma tóraǵasy Dılıara Qaıdarova.
Qazaqstanda qaterli isiktiń eń kóp taraǵan túrleri: sút bezi obyry, ókpe obyry, asqazan obyry, jatyr moıny obyry jáne kolorektaldy obyr.
Qazaqstanda jatyr moıny obyryn, sút bezi qaterli isigin jáne tik ishektiń qaterli isigin erte anyqtaý boıynsha ulttyq skrınıngtik baǵdarlamalar júrgiziledi. Qazaqstan azamattaryna onkologııalyq aýrýlardy dıagnostıkalaý jáne emdeý tegin medıtsınalyq kómektiń kepildendirilgen kólemine (GOBMP) kiredi jáne memlekettik bıýdjetten tolyǵymen qamtylǵan.
Qazirgi ýaqytta Qazaqstanda jetekshi onkologııalyq qaýymdastyqtardyń halyqaralyq hattamalaryna sáıkes keletin onkologııalyq aýrýlardy emdeýdiń qazirgi zamanǵy túrleri júrgizilýde. Targetti terapııa, ımmýnoterapııa jáne gendik ınjenerııa ádisteri belsendi qoldanylady. Barlyq hımıoterapııalyq jáne targettik preparattar tegin medıtsınalyq kómektiń kepildik berilgen kólemi (TMKKK) sheńberinde qamtamasyz etiledi. 2010 jyldan bastap súıek kemigin transplantatsııalaý júrgizilýde. 2012 jyly Qazaqstanda onkopsıhologtardyń jeke kásibı qyzmeti paıda boldy.
Jyl saıyn Qazaqstanda qaterli isik aýrýynyń 36 myńǵa jýyq jańa jaǵdaıy tirkeledi. Onkologııalyq esepte 180 myńnan astam qazaqstandyq tur.
