«Qaterli isik qanshalyqty qaýipti?» - respýblıkalyq basylymdarǵa sholý
***
Búgingi tańda dúnıejúzinde ókpege tán onkologııalyq qaterli isik aýrýlarynyń birine jatatyn ókpeniń qaterli isigi órship turǵany álemdi alańdatyp otyr. Naýqastar sany jyl saıyn artqany da jasyryn emes. Bul aýrý bizdiń elimizde de beleń alyp tur. Qazir elimizde onkologııalyq aýrýlar sany kóbeıgenimen, ony emdeý joldary da tabylyp jatyr. Alaıda keı jaǵdaıda dertke medıtsınanyń shamasy jetpeıtini de shyndyq. Solardyń aldyńǵy qatarynda ókpe qaterli isigi turǵanyn bireý bilse, bireý bilmeıdi. Demek, aýrýdyń belgileri men sebebin bilip júrgenniń esh aıyby joq. Olaı bolsa «Aıqyn» gazetiniń búgingi sanyndaǵy «Qaterli isik qanshalyqty qaýipti?» degen maqalaǵa kóz júgirtińiz.
Jaǵdaıdyń qandaı deńgeıde jáne qalaı órbip bara jatqanyn túsingendikten shyǵar, taıaýda Úkimettiń alqaly májilisinde eldegi azyq-túlik baǵasynyń ósý sebebi jáne ony aýyzdyqtaý, ınflıatsııamen kúres, halyqtyń áleýmettik-turmystyq jaǵdaıynyń tómendemeýi tóńireginde áńgime qozǵaldy. Osy alqaly jıynda Aýyl sharýashylyǵy mınıstri «qysqy jáne kóktemgi azyq-túlik baǵalarynyń ósimine negizgi sebep - olardy saqtaıtyn qoımalardyń joqtyǵy. Sondyqtan da Tótenshe jaǵdaılar mınıstrligine qarasty qoımalardy osy maqsatta paıdalaný kerek» degen usynys jasady. Osyǵan oraı «Aıqyn» gazetinde «Bojkonyń qoımasymen is bitpeıdi» degen taqyryppen maqala jarııalandy. «Biz, tipti atalǵan qoımalar osy maqsatqa paıdalanýǵa berilse de sheshilýge tıisti túıindi tarqata almaıdy-aý dep oılaımyz», - dep jazady basylym. Onyń sebebin bilgińiz kelse, basylymnyń búgingi nómirin oqyńyz.
***
«Keshegi Májilistiń dástúrli jıynynda «Parlamenttiń pármendiligi» máselesi taǵy bir márte qozǵaldy. Ótken joly «tarqasaq - tarqaıyq» degen usynysty kóldeneń tartqan depýtat Irak Elekeev bul joly óz ustanymyn tereńdetip, Májilistiń sybaılas jemqorlyqqa qarsy kúresin jandandyrý úshin teriskeıdegi eki oblystyń ákimin Parlamentke shaqyrtý týraly másele kótergen. áriptesteri muny qoldamady», - dep jazady «Alash aınasy» beısenbilik sanyndaǵy «Elekeev keıbir áriptesteri sekildi «aýyz jaýyp» otyra almaıtynyn aıtty» degen maqalasynda. Basylymnyń atap ótýinshe, halyq qalaýlysynyń bundaı usynys jasaýyna atalǵan oblystardaǵy birqatar laýazymdy qyzmetkerlerdiń jemqorlyqqa urynyp, qyzmetinen bosatylýy túrtki bolǵan.
3 maýsymda Eýropa qurlyǵynda dop dodasynyń kórigi qyzady. Qazaqstan quramasy óz alańynda Ázirbaıjandy qonaq etedi. Osy jaıt arqaý bolǵan maqala «Alash aınasy» gazetinde «Ázirbaıjandy jeńiýge ázirmiz be?» degen taqyryppen berilgen. Basylymnyń atap ótýinshe, aǵymdaǵy jyly elimizdiń quramasy 5 oıyn ótkizedi. ıAǵnı Túrkııa, Ázirbaıjan, Belgııa, Avstrııa quramalarymen tartysqa túsedi. «Osy oıyndardyń ishinde bizdiń upaı alý múmkindigimiz qandaı? Ashyǵyn aıtsaq, tek Ázirbaıjanmen ótkizetin eki kezdesýde ǵana qorjyndy tompaıtýǵa bolatyn sekildi», - deıdi basylym.
***
Sońǵy kúnderi elordalyqtardyń arasynda «Han shatyr» saýda oıyn-saýyq ortalyǵy ǵımaratynyń keıbir jerleri durys salynbaǵandyqtan jáne qabyrǵalarynyń sógilýine baılanysty jóndeýge jabylady degen gý-gý sóz taraǵan bolatyn. Tipti keıbir uzynqulaqtan jetken aqparattar qazirgi ýaqytta ǵımaratyń ishi bosatylyp jatyr dep te soqqan edi. Osy túıtkildi jaıtqa atalǵan ortalyqtyń atqarýshy dırektory Qaırat Saýdabaı naqty jaýabyn berip, keshenniń jabylmaıtyndyǵyn, qaıta bos turǵan saýda oryndarynda álemdik markalardyń núktelerin ashýǵa nıettenip jatqandyǵyn jetkizipti. Bul jaıynda «Astana aqshamy» gazetiniń búgingi nómirinde jazylǵan.
***
«Memleket basshysy Nursultan Nazarbaev keshe «QazMunaıGaz» UK» AQ Basqarma tóraǵasy Qaıyrgeldi Qabyldındi qabyldady», - dep jazady «Kazahstanskaıa pravda» gazeti. Basylymnyń atap ótýinshe, Q.Qabyldın kompanııanyń 2010 jylǵy jumysynyń qorytyndylary týraly, 2011 jylǵa arnalǵan jospary jáne 2020 jylǵa deıingi damý keleshegi jaıly baıandap berdi. «Kompanııanyń tabysy 2010 jyly 305 mıllıard teńgeni qurady, bul 2009 jylmen salystyrǵanda 2,5 ese artyq. Bıýdjetke 413 mıllıard teńge salyqtyq tólemder tólendi. Biz ulttyq kompanııa retinde áleýmettik jaýapkershilik aldyq. Ótken jyly bizdiń tarapymyzdan áleýmettik jobalardy damytýǵa 200 mıllıon AQSh dollary bólindi», - dep atap ótken Q.Qabyldın.
