Qaterli isik dertine shaldyqqandar sany 2030 jyly 22 mln. adamǵa jetedi
ASTANA. QazAqparat - Іsik aýrýlaryn zertteý jónindegi halyqaralyq agenttigi aldaǵy eki onjyldyqta atalmysh dertke shaldyǵatyn adamdar sany kóbeıedi dep boljap otyr. Bul týraly uıymnyń resmı málimdemesinde aıtylǵan, dep jazady RBK.
Zertteýshilerdiń aıtýynsha, qaterli isikke shaldyǵatyndar sany jyl saıyn 57 paıyzǵa artyp, ıaǵnı 22 mln-ǵa jetkenin kórsetken. Sol sııaqty atalǵan dertten qaıtys bolǵandar sany bir jylda 59 paıyzǵa ósip, 13 mln. adamdy qurap otyr.
Tek, 2012 jyly álem boıynsha qaterli dertpen aýyratyn 22 mln. adam tirkelgen. Onyń 13 paıyzyn, naqty aıtqanda 1,8 mln. ókpe isigine shaldyqqandar quraǵan. Sondaı-aq tap sol jyly qaterli dertten 8,2 mln. adam qaıtys bolǵan.
«Onkologııalyq aýrýlardy emdeýdi damytyp jatqanymyzben, atalǵan dertten túbegeıli qutylýdyń jolyn taba almaı kelemiz. Mundaı aýrýlardyń kóbeıip jatqany adamzattyń amandyǵy men damýyna qaýip tóndirip otyr. Biz jarııalap otyrǵan boljamdar - atalǵan dertpen kúresý kerektigi týraly búkil adamzatqa baǵyttalǵan dabyl bolyp tabylady», - deıdi agenttiktiń basshysy Krıstofer Ýaıld.
Atalǵan boljamdy jarııalaǵan uıymnyń sarapshylary kedeı elderde temeki ónimderin paıdalanýdy azaıtyp, damyǵan memleketterde dene shynyqtyrý belsendiligin arttyrýdy usynyp otyr. Áleýmettik baǵdarlamalardan bólek, ǵalymdar isikti bastapqy kezde anyqtaý maqsatynda rentgenoskopııany damytýǵa keńes beredi.
Aıta keterligi, Іsik aýrýlaryn zertteý jónindegi halyqaralyq agenttigi 1965 jyly Dúnıejúzilik densaýlyq saqtaý uıymynyń janynan qurylǵan. Agenttik medıtsınalyq zertteýdi úılestirý jáne ǵylymı-zertteý jumysymen aınalysady. Uıymnyń shtab-páteri Lıonda ornalasqan.
