Qaterli isik aýrýlarynyń eń joǵary kórsetkishi Shyǵys Qazaqstan oblysynda tirkelgen
ASTANA. 6 naýryz. QazAqparat - Búgin QR Parlamenti Májilisiniń «Nur Otan» HDP fraktsııasy janyndaǵy Áleýmettik keńesiniń jańa shaqyrylymdaǵy tuńǵysh otyrysy bolyp ótti.
Onda «Qazaqstan Respýblıkasynda onkologııalyq kómekti damytý týraly» salalyq baǵdarlamanyń jobasy talqylandy.
Esterińizge sala keteıik, Elbasy N. Nazarbaev aǵymdaǵy jylǵy halyqqa joldaýynda Úkimetke onkologııalyq kómekti damytý jónindegi salalyq baǵdarlamany eki aı ishinde ázirleýdi tapsyrǵan bolatyn. Budan bólek, Prezıdent Ulttyq medıtsınalyq holdıng bazasynda Astanada onkologııalyq ortalyq qurý máselesin tapsyrǵan edi. Osyǵan oraı, densaýlyq saqtaý mınıstrligi 2012-2016 jyldarǵa arnalǵan Qazaqstan Respýblıkasyndaǵy onkologııalyq kómekti damytýdyń salalyq baǵdarlama jobasyn ázirledi.
«Búgingi kúni dıspanserlik esepte qaterli isiktiń belgileri bar 144 myńnan astam naýqas tirkeýde tur. Onyń ishinde onkologııalyq aýrýlardyń eń joǵary kórsetkishi Shyǵys Qazaqstan oblysynda tirkelgen. Bul óńirde 100 myń adamǵa shaqqandaǵy naýqastar 271 adamdy quraıdy. Al Soltústik Qazaqstan oblysynda 269,6, Qaraǵandy oblysynda 258,8 jáne Almaty oblysynda - 250,4 adamdy qurap otyr. Qaterli isiktiń belgileri boıynsha erte kezeńde anyqtalý deńgeıi 49,5 paıyzdy quraıdy. Salystyrmaly túrde alatyn bolsaq, Frantsııada bul 68 paıyz, Izraılde - 63, Ońtústik Koreıada - 60 paıyzdy qurap otyr», - dedi jıyndy ashyp, sóz sóılegen «Nur Otan» HDP fraktsııasy janyndaǵy Áleýmettik keńestiń tóraıymy Aıtkúl Samaqova.
Onyń aıtýynsha, qaterli isik belgilerinen bolatyn ólim-jitimde birinshi orynda ókpe ragy tur. Bul jalpy qaterli isikten bolatyn ólim-jitimniń 16 paıyzyn quraıdy. Odan keıingi orynda asqazan ragy - 13, úshinshi orynda sút bezi ragy - 8 paıyzdan astam. «Onkologııalyq aýrýlardan bolatyn ólim deńgeıi júrek-qan aınalymynan keıingi ekinshi orynda tur», - deıdi A. Samaqova.
Jalpy alǵanda atalǵan baǵdarlamanyń maqsaty aýrýdyń osy túrinen bolatyn ólim-jitimdi azaıtý arqyly qazaqstandyqtardyń ómir sapasy men ómir súrý uzaqtyǵyn arttyrý bolyp tabylady. Bul rette 2012-2016 jyldarǵa arnalǵan keshendi is sharalar kózdeledi. Atap aıtqanda, aýrýdyń aldyn alýǵa baǵyttalǵan sharalar, onyń ishinde skrınıngtik baǵdarlamalardy keńeıte túsýge mańyz beriledi. Kadr áleýetin damytyp, onkologııalyq naýqastarǵa zamanaýı tehnologııalar arqyly járdemdi damytý sharalary da qarastyrylǵan.
