Qaterli isigi bar naýqastar úshin koronavırýs qanshalyqty qaýipti

ALMATY. QazAqparat -Medıtsına ǵylymdarynyń doktory, professor, joǵary sanatty onkolog, Qazaqstan onkologtary qaýymdastyǵynyń múshesi Raıymqul Qaraqulov onkologııalyq aýrýǵa shaldyqqandar úshin koronavırýs qanshalyqty qaýipti ekenin aıtty, dep habarlaıdy QazAqparat tilshisi.

«Qaterli isikke shaldyqqan naýqastar koronavırýs juqtyrsa bul úlken problema. Mundaı patsıentterdi emdeý óte qıyn. Eń aldymen, qandaǵy vırýsty joıý kerek, sodan keıin qaterli isikke qarsy terapııa júrgizý qajet. Eki ádis te adam aǵzasyna agressıvti. Qazir koronavırýspen aýyratyn onkologııalyq naýqastardy qalaı emdeý kerektigi týraly kóptegen zertteýler bar. Biz emdeý jumystaryn júrgizemiz. Eń bastysy - profılaktıkalyq rejımdi saqtaý qajet. Atap aıtar bolsam, qoldy jıi jýyp, maska taǵyp júrý kerek. Al medıtsınalyq personaldyń mindetti túrde qorǵanysh kıimin qoldanǵany abzal», - dedi professor.

Sonymen qatar, ol koronavırýs ınfektsııasy onkologııasy bar naýqastardyń ómirine qaýip tóndiretinin atap ótti.

«KVI qaterligi isigi bar adamdar úshin qaýipti. Bul árıne kóptegen faktorlarǵa baılanysty. Munda aýrýdyń satysy men naýqastyń jasy da úlken ról atqarady. Eger metastaza bolmasa, koronavırýsty emdeý de jeńil. Koronavırýs ınfektsııasy aýrýdyń tórtinshi satysynda paıda bolatyn jaǵdaılar da bar. Bul qıyn. Degenmen emdep jazýǵa tyrysamyz», - dep tolyqtyrdy onkolog.

Buǵan deıin, «Qazaq onkologııa jáne radıologııa ǵylymı-zertteý ınstıtýty» AQ basqarma tóraıymy, QR Ulttyq ǵylym akademııasynyń akademıgi, medıtsına ǵylymdarynyń doktory Dılıara Qaıdarova koronavırýstyń qaterli isikke shaldyqqan naýqastarǵa qalaı áser etetinin aıtqan bolatyn.