Qaterli isikterdi erte anyqtaý: Almatyda 2 myń adamǵa dıagnoz qoıyldy
ALMATY. KAZINFORM — Almatyda onkologııalyq aýrýlardy erte anyqtaý jumystary kúsheıtilip keledi.
Qoǵamdyq densaýlyq saqtaý basqarmasynyń málimetinshe, Almaty onkologııalyq ortalyǵynda melanoma, teri obyry jáne qalqansha bezi aýrýlarynyń aldyn alý men erte anyqtaýǵa arnalǵan Ashyq esik kúni ótti. Іs-shara aıasynda 179 adamǵa dáriger-onkologtar keńes berdi. Sonymen qatar birqatar naýqasqa qalqansha bezi men jumsaq tinderdiń ýltradybystyq zertteýi júrgizildi.
— Tekserý qorytyndysy boıynsha bes naýqastan teri obyryna kúdik anyqtaldy. Qazirgi ýaqytta olar dıagnozdy naqtylaý jáne ári qaraı emdeý taktıkasyn aıqyndaý úshin qosymsha tekserýden ótip jatyr, — dedi Almaty onkologııalyq ortalyǵynyń konsýltatıvtik-dıagnostıkalyq bólimshesiniń meńgerýshisi Aqbota Ádilova.
Mamandardyń aıtýynsha, onkologııalyq aýrýlardy erte anyqtaý — emniń tıimdi bolýyn qamtamasyz etetin negizgi faktorlardyń biri. Skrınıngtik baǵdarlamalar men dıagnostıkalyq kómektiń qoljetimdiligin arttyrýdyń arqasynda Almatyda qaterli isikterdi erte anyqtaý kórsetkishi jaqsaryp keledi.
Máselen, 2026 jyldyń tórt aıynda Almatyda alǵash ret onkologııalyq dıagnoz qoıylǵan 1962 naýqas tirkelgen. Dárigerler muny halyqtyń profılaktıkalyq tekserýlerge jıi qatysýymen jáne dıagnostıka sapasynyń artýymen baılanystyrady.
Eske salaıyq, eldegi balalar onkologııasynda zamanaýı emdeý ádisteri engizilip jatyr.
