Qaterli isikten bolatyn ólim-jitim tómendedi - Ermek Kósherbaev

ASTANA. KAZINFORM — Óńirlerde medıtsınalyq qyzmetkerler jetispeıdi. Bul týraly Parlament Májilisinde QR Premer-Mınıstriniń orynbasary Ermek Kósherbaev málim etti.

- Densaýlyq saqtaý salasy - Úkimet jumysynyń basym baǵytynyń biri. Salada biraz jumystar atqaryldy. Byltyr bala ólimi 8,3 paıyzǵa, ana ólimi 11,3 paıyzǵa azaıdy. Halyqtyń nysanaly toptaryn onkologııalyq skrınıngpen qamtý 16 paıyzǵa ósti. Atap aıtqanda, 2 mln 800 myń adam onkologııalyq skrınıngten ótti. Nátıjesinde, qaterli isikten bolatyn ólim-jitim kórsetketkishi 2,8 paıyzǵa tómendedi, - dedi E.Kósherbaev.

Ol Úkimet «Aýylda densaýlyq saqtaýdy jańǵyrtý» ulttyq jobasyn júzege asyryp jatqanyn eske saldy. Joba aıasynda 467 nysannyń qurysy aıaqtaldy. 188 nysandy jyl sońyna deıin iske qosylady.

- Sonymen qatar, oblystarda iri zamanaýı medıtsınalyq nysandardyń qurylysy júrip jatyr. Olardy tıisti merzimde ári sapaly aıaqtaýdy oblys ákimderine tapsyrdyq. Bul jumys bizdiń erekshe baqylaýda tur. Óńirlerde medıtsınalyq qyzmetkerlerdiń jetispeıtini ras. Bul másele kezeń-kezeńmen sheshilip keledi. Memleket tarapynan jas mamandarǵa ústemaqy tóleý, granttar sanyn kóbeıtý, ákimdikter arqyly turǵyn úı berý qarastyrylǵan, - dedi Úkimet basshysynyń orynbasary.

Budan buryn habarlanǵandaı, endi MÁMS-pen qamtylmaǵandar aqysyz onkologııalyq skrınıngten óte alady.