Qaterli isikti erte anyqtaǵan ózbekstandyq dárigerlerge syıaqy beriledi

TAShKENT. KAZINFORM – Onkologııalyq dertterdi erte damý satysynda anyqtaǵan Ózbekstandaǵy medıtsınalyq brıgadalarǵa syıaqy beriledi. Bul týraly 2024 jylǵa arnalǵan bilim berý, densaýlyq saqtaý, tsıfrlandyrý, mádenıet jáne sport salalaryndaǵy máseleler talqylanǵan keńeste Ózbekstan basshysy Shavkat Mırzıeev málimdedi, dep habarlaıdy Kazinform agenttiginiń Tashkenttegi menshikti tilshisi.

Qaterli isikti asqyný dárejesine jetkizbeı anyqtaǵan mamandarǵa ár dıagnoz úshin syıaqy berý jobasy 1 mamyrdan Qashqadarııa oblysynda qolǵa alynady. Al keler jyly bul mehanızm eldiń barlyq aımaǵynda engiziledi.

Sondaı-aq, keńes barysynda táýekel tobyna kiretin turǵyndardy skrınıngten ótkizý júıesi ózgeretini aıtyldy. Bul baǵyttaǵy isterge endi respýblıkalyq kardıologııa, endokrınologııa jáne onkologııa ortalyqtary jaýapty bolady.

Sheteldik sarapshylardy tarta otyryp, eskirgen klınıkalyq hattama men talaptar halyqaralyq standarttarǵa beıimdeledi. Buǵan qosa, ózbekstandyq dárigerler jeńil aýrýy bar naýqastardy tek dári-dármekpen emdeý júıesinen oıysyp, onyń ornyna ımmýnıtetti kóteretin tabıǵı ónim, fızıkalyq jattyǵý jáne fıtoterapııany qoldanýdy josparlap otyr.

Jıyn barysynda Shavkat Mırzıeev medıtsına salasyndaǵy birqatar olqylyqqa da toqtaldy. Ózbekstan prezıdenti atap ótkendeı, keıingi 7 jylda 7 mınıstr ózgergen, biraq sektordy tsıfrlandyrý jáne medıtsınalyq saqtandyrýdy engizý baıaý júrip jatyr.

Osyǵan baılanysty Shavkat Mırzıeev premer-mınıstrge áleýmettik salaǵa jýapty mınıstrler men olardyń orynbasarlaryn bir jyl merzimge kelisimshartpen qyzmetke alýdy tapsyrdy. Mundaı mehanızm hokımderdiń orynbasarlaryna qatysty da qoldanylady. Tıisinshe kelisimshartpen laýazym ıelengen sheneýlikterdiń qyzmet tıimdiligin anyqtaıtyn KPI kórsetkishteri belgilenedi.