Qaterli isikke qarsy otandyq dári qashan daıyn bolady

ASTANA. KAZINFORM – Qazaq onkologııa jáne radıologııa ǵylymı-zertteý ınstıtýtynyń basqarma tóraǵasy Erbol Bekmuhambetov qaterli isikke qarsy otandyq dári synaǵy qashan aıaqtalatynyn aıtty.

Búgin Ortalyq kommýnıkatsııalar qyzmetindegi brıfıngte BAQ ókilderi ınstıtýt basshysynan otandasymyz, bıotehnolog Dos Sarbasov oılap tapqan qaterli isikke qarsy dári qashan tolyq synaqtan ótetindigin suraǵan edi.

- Dári qazirgi zamanǵy hımııaterapııa barlyq múmkindigin sarqyǵan patsıentterdi emdeýge arnalǵan. Klınıkalyq zertteý áli júrip jatyr, aıaqtalǵan joq. Klınıkalyq synaqtyń ekinshi kezeńi júrgizilip jatyr. Jaqsy nátıje jáne janama áser barynsha az bolýy úshin belsendi zattardyń durys mólsheri irikteledi. Atalǵan synaqtar aıaqtalǵan soń tirkeý rásimi júrgiziledi, - dedi ol.

Onyń aıtýynsha, protsesti kez kelgen turaqtandyrý – oń nátıje.

- Klınıkalyq materıaldardy tolyq jınaǵannan keıin biz muny mindetti túrde aıtamyz. Synaqtyń qazirgi kezeńi jyl sońyna deıin júrgiziletini anyq. Sodan keıin ǵana nátıjesin tolyq kóre alamyz, - dep jaýap berdi Erbol Bekmuhambetov.

Ótken jyldyń qańtarynda Ǵylym jáne joǵary bilim mınıstri Saıasat Nurbek otandyq ǵalym qaterli isikke qarsy dári oılap tapqanyn aıtqan bolatyn. 

Mınıstrdiń aıtýynsha, ınnovatsııalyq dárini aldymen qoıandar men tyshqandarǵa synaǵan. Sosyn onkologııa ýnıversıtetinde 15 adam synaqtyń birinshi kezeńnen ótti.

- Olar qaterli isikpen aýyratyn adamdar. Kelesi jyly naryqqa shyǵýdy josparlap otyrmyz, - degen edi Saıasat Nurbek.