Qaterli isik Shvetsııadaǵy ólim-jitimniń negizgi sebebine aınaldy

ASTANA. KAZINFORM — Sońǵy onjyldyqtarda Shvetsııada ólim deńgeıi aıtarlyqtaı tómendegen, dep habarlaıdy AZERTADJ.

1969 jyldan beri ár 100 000 turǵynǵa shaqqandaǵy ólim sany 50%-dan astam azaıǵan, al ómir súrý uzaqtyǵy shamamen on jylǵa artqan.

Shvetsııanyń Ortalyq statıstıka bıýrosynyń málimetinshe, ótken jyly áıelder orta eseppen 85,4 jasqa deıin, al er adamdar — 82,3 jasqa deıin ómir súrgen. Bul ózgeristiń basty sebebi — júrek-qantamyr aýrýlarynan bolatyn ólimniń kúrt azaıýy.

1969 jyly ınfarkt pen ınsýlttan ár 100 000 turǵynǵa shaqqanda shamamen 1000 áıel jáne 1200-den astam er adam qaıtys bolǵan. Al ótken jyly bul kórsetkish tıisinshe 200 jáne 300-ge deıin tómendegen.

Osy ózgerister aıasynda qaterli isik birtindep ólimniń negizgi sebebine aınalyp keledi. Eldiń birneshe óńirinde — Stokgolm, Ýppsala jáne Gotlandta qaterli isik áıelder arasyndaǵy basty ólim sebebi bolsa, erler arasynda Stokgolm, Halland jáne Gotland aımaqtarynda birinshi orynǵa shyqqan.

Jastar arasyndaǵy ólim-jitim de azaıyp keledi. Ótken jyly nárestelerdiń syrtqy sebepterden shetineý jaǵdaılary tirkelmegen. Sondaı-aq kenetten shetineý sındromynan (SVDS) qaıtys bolǵan balalar sany rekordty tómen deńgeıge jetken: ótken jyly 6 jaǵdaı tirkelgen, bul — bir jyl burynǵy 13 jaǵdaımen jáne 1990 jylǵy 146 jaǵdaımen salystyrǵanda áldeqaıda az.

Mamandardyń aıtýynsha, bul statıstıkalyq derekter senimdi jáne ólim-jitimdi azaıtýǵa baǵyttalǵan ǵylymı zertteýlerde keńinen qoldanylady.

Osydan buryn Shvetsııada kópbalaly otbasylarǵa arnalǵan áleýmettik tólemderdi qysqartý josparlanyp otyrǵanyn jazǵan edik.