Qatelikterdi durystap, myqty bolyp oralamyn — Ábıba Ábýjaqynova
NAGOıA.KAZINFORM — Qazaqstandyq sportshy Ábıba Ábýjaqynova Japonııada ótip jatqan HH jazǵy Azııa oıyndarynyń kúmis júldegeri atandy. Fınaldyq beldesýden keıin, sportshy Kazinform tilshisine shaǵyn suhbat berip, búgingi jarys jolyn qorytyndylady.
Ábıba fınaldyq jekpe-jektegi jeńilisi týraly pikir bildirdi.
— Fınaldyq beldesýde japondyq qyzǵa qarsy kúresetinimizdi bildik. Sol sebepti qajetti taktıka daıyndadyq. Parterge daıyndyq jasadym. Alaıda, qansha berilmegenimmen qarsylastyń ádisine túsip qaldym, — dedi ol.
Sportshy jaraqattan keıingi qalypqa kelýi jáne aldaǵy jospary týraly aıtty.
— Jarysqa jaqsy daıyndyqpen, nyq senimmen keldik. Jaraqatyma baılanysty operatsııa jasatyp, qalypqa keldim. Sodan keıin Azııa oıyndarynda tatamıge shyǵyp turmyn. Endi aldaǵy kúnderi Astanadaǵy álem chempıonatynda jarys jolyna shyǵamyn, — dedi dzıýdoshy.
Ábıba sóz sońynda qazaqstandyqtardyń qoldaýyna alǵys aıtyp, aldaǵy josparymen bólisti.
— Senim artyp, múmkindik bergen bapkerlerime raqmet. Tatamıde turyp kúresýden bapkerler tarapynan jaqsy pikir aldym. Alaıda, aldaǵy ýaqytta qatelikterdi saralap, parterge daıyndyqty kúsheıtemin. Astanadaǵy Álem chempıonatynda jaqsy óner kórsetýge tyrysamyn, — dedi sportshy.
Osyǵan deıin habarlaǵanymyzdaı, Ábıba Ábýjaqynova áıelder arasynda 48 keli salmaqta aqtyq synda japondyq sportshy Mıtsýkı Kondoǵa ese jiberip, kúmis júlde jeńip aldy.
Sonymen qatar, erler arasynda 60 keli salmaqta fınalda óner kórsetken Eldos Smetov Azııa oıyndarynda kúmis júldeger atandy.
