Qatelikpen bosatylǵan: Londonda 14 jastaǵy qyzdy qorlaǵan qylmysker ustaldy

ASTANA. KAZINFORM — Chelmsford túrmesinen qatelikpen bosatylǵan Efıopııa azamatyn London polıtsııasy qaıta qolǵa túsirdi, dep jazdy BBC.

Aqparatta aıtylǵandaı, Efıopııa azamaty Hadýsh Kebatý maýsym aıynda Ulybrıtanııaǵa baspana izdep, qaıyqpen kelgen. Qyrkúıek aıynda ol 12 aı merzimge bas bostandyǵynan aıyrylǵan. Kebatýǵa eki jynystyq zorlyq faktisi, sonyń ishinde 14 jastaǵy qyzǵa qatysty qylmys jasaǵany úshin úkim shyqqan. Úkim shyǵarylǵannan keıin ony mıgranttarǵa arnalǵan ortalyqqa kóshirý josparlanǵan edi, alaıda juma kúni ol túrmeden qatelikpen bosatylyp ketken.

Eldiń ádilet mınıstri Devıd Lemmı bul oqıǵaǵa baılanysty tergeý júrgizýdi tapsyrdy. Al ishki ister mınıstri Shabana Mahmýd Kebatýdy jaqyn ýaqytta elden deportatsııalaý josparlanyp otyrǵanyn málimdedi.

Bul — mundaı jaǵdaıdyń alǵashqysy emes. Buǵan deıin dál sol Chelmsford túrmesinde alaıaqtyq úshin sottalǵan Djýnead Ahmed te jalǵan qujattyń negizinde bosatylǵan. Túrme ákimshiligi Koroldik sottan kelgendeı etip jasalǵan jalǵan hatqa senip, ony erkindikke shyǵarǵan.

Aıta keteıik, atalǵan oqıǵa qoǵamda úlken pikir týdyrdy. Ulybrıtanııa premer-mınıstri Kır Starmer Hadýsh Kebatýdyń Chelmsford túrmesinen qatelikpen bosatylýyna baılanysty ashý-yzaǵa toly pikir  bildirdi. Ol mundaı jaǵdaıdyń múlde qabyldaýǵa bolmaıtynyn aıtyp, tergeý júrip jatqanyn atap ótti.

Sky News málimetinshe, 2024 jyldyń naýryzynan 2025 jyldyń naýryzyna deıin Ulybrıtanııada barlyǵy 262 sottalǵan adam qatelikpen bosatylǵan. Bul aldyńǵy jylmen salystyrǵanda 128 paıyzǵa kóp (115 jaǵdaı). Onyń ishinde 233 adam túrmeden, al taǵy 29 adam sot zalynan qate sheshim nátıjesinde bosatylǵan.