Qatelikke jol joq - Prezıdent salyq-bıýdjet reformalary týraly

ASTANA. KAZINFORM – Prezıdent Qasym-Jomart Toqaev Úkimettiń salyq-bıýdjet júıesin reformalaý týraly usynysyn maquldady, biraq halyqqa túsindirý jumystaryn júrgizý keregin basa aıtty.

− Reformany mindetti túrde júrgizý kerek, ol boıynsha esh kúmán joq. Biraq eń aldymen qoǵamǵa, jalpy halyqqa jaqsylap túsindirý kerek qoı. Onyń bárin talqylap, oılaný kerek. Jalpy reforma kerek dep aıtyp jatyrmyn, bul reformany maquldadym. Endi ony talqylaý kerek, zertteý kerek. Qazir Salyq kodeksi jobasy Májiliste qaralyp jatyr. Bul jaqsy nátıje, biraq bıyl 2025 jyly Salyq kodeksine ne bolmasa Bıýdjet kodeksine nazar aýdarý kerek. Qatelikke jol joq. Sondyqtan iske kirisińizder, − dedi Memleket basshysy Úkimettiń búgingi keńeıtilgen otyrysynda.

Prezıdent Ulttyq qordan bólinetin transfertterdiń kólemin azaıtý jáne onyń jınaqtaý fýnktsııasyn kúsheıtý – basty mindet ekenin eske saldy.

− Jınaqtalǵan qarajatty iri ınfraqurylymdyq jobalardy qarjylandyrýǵa baǵyttaý kerek. Osylaısha, biz memlekettiń damý fýnktsııasyn nyǵaıtamyz, - dedi Qasym-Jomart Toqaev.

Premer-mınıstr Oljas Bektenov Úkimettiń keńeıtilgen otyrysynda salyq saıasatynyń jańa baǵyty jóninde baıandaǵan edi.

Aıta keteıik, Astanada Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr. Onda elimizdiń 2024 jylǵy áleýmettik-ekonomıkalyq damýynyń qorytyndylary shyǵarylyp, Úkimettiń aldaǵy kezeńge arnalǵan negizgi mindetteri belgilenedi.

Buǵan deıin Kazinform agenttigi Úkimettiń byltyrǵy keńeıtilgen otyrysynda berilgen tapsyrmalar qanshalyqty oryndalǵanyn taldap kórgen edi.